Լոռու մարզի դատախազություն՝ Լոռու մարզում 2020թ-ին ապօրինի անտառահատումների դեպքերն ավելացել են 45%-ով

Լոռու մարզի դատախազություն՝ Լոռու մարզում 2020թ-ին ապօրինի անտառահատումների դեպքերն ավելացել են 45%-ով

Լոռու մարզում 2020թ-ին 45%-ով ավելացել են ապօրինի անտառահատումների դեպքերը 2019թ-ի համեմատ: Ապօրինի ծառահատումների դեպքերն ուսումնասիրել և ամփոփել է Լոռու մարզի դատախազությունը:

Ըստ այդմ, 2020թ. ընթացքում արձանագրվել է ապօրինի ծառահատման 263 դեպք, որոնցից 138 դեպքով հարուցվել են քրեական գործեր: Ապօրինի անտառահատումներին առնչվող 7 քրեական գործ հարուցվել է անտառների պահպանության համար պատասխանատու պաշտոնատար անձանց կողմից տարաբնույթ առերևույթ կոռուպցիոն հանցավոր արարքների կապակցությամբ:

Քրեական այդ գործերով պատճառված վնասի ընդհանուր չափը կազմել է 453 միլիոն դրամ: Դրանից վերականգնվել է 1 միլիոն 387 հազար 780 դրամը, մնացած մասի վերականգնման ուղղությամբ ձեռնարկվում են համապատասխան միջոցներ:

Հարուցված քրեական գործերից 26-ով նախաքննությունը շարունակվում է, իսկ 29 քրեական գործ մեղադրական եզրակացությամբ ուղարկվել է դատարան:

Դատախազությունը հատումների աճը կապում է անտառագոտիների նկատմամբ իրականացվող վերահսկողության, կանխարգելիչ միջոցառումների և հանցավոր հատումներ կատարողների բացահայտման գործընթացում թերությունների և արցախյան պատերազմում ռազմական գործողություններին մարզի ոստիկանության մեծ թվով ծառայողների մասնակցությամբ և այդ ընթացքում իրենց աշխատանքային պարտականությունները ժամանակավորապես կատարելու հնարավորությունից զրկված լինելու հանգամանքով:

Ապօրինի հանցավոր հատումները կատարած անձանց ի հայտ չբերելու պատճառով վարույթը կասեցված գործերի քանակը կազմում է տարվա ընթացքում հարուցված քրեական գործերի ավելի քան 45%-ը: Միայն վարույթը կասեցված չբացահայտված քրեական գործերով արձանագրվել է ապօրինի հատված 3890 ծառ, իսկ պատճառված վնասը կազմել է 250 միլիոն 443 հազար 270 դրամ:

Քրեական գործերի նյութերի ուսումնասիրության համաձայն՝ որոշ դեպքեր տեղի են ունեցել ակներևության պայմաններում և կրել են տևական ու շարունակական բնույթ և չնայած դրան՝ ակնհայտորեն դուրս են մնացել անտառների պահպանության համար պատասխանատու պետական մարմինների տեսադաշտից:

Այս ամենը հաշվի առնելով՝ ապօրինի ծառահատումների դեմ արդյունավետ պայքար մղելու, գործուն միջոցներ ձեռնարկելու նպատակով Լոռու մարզի դատախազ Կարեն Գաբրիելյանը դիմել է ՀՀ Ոստիկանության պետի տեղակալին՝ ոստիկանության իրավասություններից բխող գործառույթների կտրուկ ակտիվացման հարցով:

Գրությամբ հրատապ անհրաժեշտություն է համարվել  Լոռու մարզի վարչական տարածքի անտառամերձ ճանապարհահատվածներում ամենօրյա հսկողության սահմանումը, անտառամերձ բնակավայրերի ամենագնաց և թափքի առկայությամբ ավտոմեքենաների շարժի,  նշված բնակավայրերում և հարակից տա­րածք­նե­րում գոր­ծող փայ­տամ­շակ­ման ար­տադ­րա­մա­սե­րի, փայ­տա­գոր­ծութ­յամբ զբաղ­վող ան­հատ ձեռ­նար­կա­տե­րե­րի ար­հես­տա­նոց­նե­րի գործունեության նկատմամբ հսկողության, ստուգումների ավելացումը, անտառային տարածքներ ունեցող բնակավայրերից, Լոռու մարզի վարչական տարածքներից ելք կատարվող ճանապարհներին ամենօրյա և 24 ժամյա ուժեղացված ծառայության սահմանումը:

Հատուկ կարևորություն է տվել  ապօրինի ծառահատումների դեմ արդյունավետ պայքար մղելու նպատակով «Հայանտառ» ՊՈԱԿ-ի՝ Լոռու մարզի վարչական տարածքը սպասարկող մասնաճյուղերի և ՀՀ բնապահպանության և ընդերքի տեսչական մարմնի Լոռու տարածքային բաժնի աշխատակիցների հետ Ոստիկանության համապատասխան ծառայությունների ակտիվ համագործակցությանը և հատկապես օպերատիվ-հետախուզական ծավալուն միջոցառումների ձեռնարկմանը՝ անտառահատման չբացահայտված հանցավոր դեպքերը, դրանք կատարող անձանց, ինչպես նաև դրանց նպաստող՝ պաշտոնատար անձանց ներգրավմամբ հնարավոր կոռուպցիոն գործարքները բացահայտելու համար:

Այս մասին տեղեկացնում է ՀՀ դատախազությունը: 

Փետրվար 17, 2021 at 15:11


Առնչվող նյութեր


Կատեգորիա

ավելին
պակաս

Մարզեր