ՀՀ շրջակա միջավայրի նախարարությունը դրական եզրակացություն է տվել «Ատ-Մետալս» ՍՊԸ-ի Տաշտունի ոսկու կորզման գործարանի վերազինման նախագծի շրջակա միջավայրի վրա ազդեցության նախնական գնահատման հայտին:
«Ատ-Մետալս» ՍՊԸ-ն Մեղրասարի ոսկու հանքավայրի ընդերքօգտագործման թույլտվությունը ստացել է 2014թ. 7,5 տարի ժամկետով։ Կարճ ժամանակահատված հանքի և գործարանի շահագործումից հետո՝ 2015թ., աշխատանքները դադարեցվել էին: Ըստ Արդյունահող ճյուղերի թափանցիկության նախաձեռնության (ԱՃԹՆ) շրջանակներում Ընկերության ներկայացրած հաշվետվությունների՝ «Ատ-Մետալս»-ը 2016 և 2018 թվականներին հանքը չի շահագործել, իսկ 2017թ. Ընկերության արտադրության ծավալը կազմել է 14257 տոննա, որից՝ 10855 տոննա ոսկու հանքաքարից, 1000 տոննան իրացրել է «Թոմ ընդ Միր» ՍՊԸ-ին, 9855 տոննան՝ «Կապանի լեռնահարստացման կոմբինատ» ՓԲԸ-ին։ 2019թ-ին Ընկերությունն արդյունահանել է 10811 տ հանքաքար, որից 9203 տոննան իրացրել է «Չաարատ Կապան» ՓԲԸ-ին:
Ըստ հայտի՝ Ընկերությունը նախորդ նախագծով նախատեսում էր ոսկու կորզումն իրականացնել՝ որպես լուծազատիչ օգտագործելով թիոկարբամիդի լուծույթը: Սակայն փորձարկումները ցույց են տվել, որ տվյալ հանքաքարից ոսկու և արծաթի կորզումն այս եղանակով արդյունավետ չէ: Ներկայումս նախատեսվում է հանքաքարից ոսկու և արծաթի կորզման համար փորձարկել չինացի մասնագետների կողմից երաշխավորված նոր SD-0103 լուծազատիչը: Նոր տեխնոլոգիայով նախատեսվում է համատեղել լուծազատման և սորբցիոն տեխնոլոգիաները՝ որպես սորբենտ օգտագործելով ակտիվացրած ածուխը:
Գործարանը գտնվում է Մեղրի խոշորացված համայնքի Տաշտուն բնակավայրի տարածքում: Մոտակա բնակավայրերն են Լիճքը՝ 1,1 կմ հեռավորության վրա, Վանքը՝ 6 կմ հեռավորության վրա և Կալերը՝ 7,7 կմ հեռավորության վրա:
Նախատեսվում է տարեկան վերամշակել 52 000 տոննա հանքաքար: Աշխատանքային ռեժիմը՝ տարին 345 օր, 3 հերթափոխ: Ձեռնարկությունն աշխատելու է լրիվ շրջանառու համակարգով, բացառվելու է արտադրական կեղտաջրերի արտահոսքը բաց ջրավազաններ:
Ըստ հայտի ընդհանուր արտանետումները մթնոլորտ կազմելու են 46.51տ/տարի:
Ինչպես խմելու-տնտեսական, այնպես էլ տեխնոլոգիական կարիքների համար օգտագործվելու է խմելու որակի ջուր Տաշտուն գյուղի խմելու-տնտեսական ցանցից:
Նախատեսվող բնապահպանական միջոցառումներից են.
- Չոր աղացման հանգույցում արտանետումների որսման համար տեղադրվելու են մարտկոցային ցիկլոններ, որոնց արդյունավետությունը հասնում է 98%-ի:
- Տարալվացման կափարիչներն ունեն կափարիչներ, իսկ պրոցեսն անցկացվում է հիմնային միջավայրում, որպեսզի նվազագույնի հասցվեն հնարավոր արտանետումները:
- Ոսկու ձուլվածքից արծաթի և այլ խառնուկների անջատման ընթացքում ազոտական թթվի գոլորշիների կլանման և չեզոքացման համար նախատեսվում է տեղադրել սկրուբեր (չեզոքացման համար օգտագործվելու է NaOH լուծույթը):
- Լուծազատման բաքերից հնարավոր վերթափումների համար նախատեսված է վթարային ավազան, որտեղից թափվածքները պոմպի օգնությամբ վերադառնալու են լուծազատման պրոցես:
«Ատ-Մետալս» ՍՊԸ-ին ներկայացված փորձաքննական պահանջներն են.
- Ֆաբրիկայի աշխատանքի արդյունքում առաջացած արտադրական թափոնների հեռացումը և տեղադրումն իրականացնել թափոնների անձնագրով սահմանված պահանջներին համապատասխան:
- Ֆաբրիկայի շահագործման ընթացքում անհրաժեշտ է պահպանել բնապահպանական և մոնիթորինգի պլաններով նախատեսված միջոցառումները
- Վերազինման ընթացքում պահպանել աշխատանքի անվտանգության նորմերը՝ ՀՀ աշխատանքի օրենսգրքի 23-րդ գլխի պահանջներին համաձայն:
- Աշխատանքների իրականացման ընթացքում անհրաժեշտ է խստագույնս հետևել ՇՄԱԳ հաշվետվությունում և նախագծային փաստաթղթերում ամրագրված տեխնոլոգիական նախագծման նորմերին, բնապահպանական և սոցիալական կառավարման ծրագրի պահանջներին (շրջակա միջավայրի՝ մթնոլորտային օդի, հողի, ջրային ռեսուրսների, կենսաբազմազանության վրա ազդեցության կանխարգելմանը, նվազեցմանը կամ բացառմանն ուղղված բնապահպանական, արտակարգ իրավիճակների, անբարենպաստ պայմանների և վթարային իրավիճակների հետևանքով առաջացող հնարավոր ազդեցությունների մեղմացմանն ուղղված միջոցառումներ և ծրագրեր):
Օգոստոս 03, 2021 at 18:27