«ՀԲ ՓՈՐՁԱԳԵՏՆԵՐԻ ՁԵՌՔԵՐՈՎ ՄԵՆՔ ԱՄԲՈՂՋ ԱՐԴՅՈՒՆԱԲԵՐՈՒԹՅՈՒՆԸ ԶՐՈՅԻ ՀԱՍՑՐԻՆՔ»

«ՀԲ ՓՈՐՁԱԳԵՏՆԵՐԻ ՁԵՌՔԵՐՈՎ ՄԵՆՔ ԱՄԲՈՂՋ ԱՐԴՅՈՒՆԱԲԵՐՈՒԹՅՈՒՆԸ ԶՐՈՅԻ ՀԱՍՑՐԻՆՔ»

Ինգա Մարտինյան, Հետք
 
«Եթե քաղաքապետարանի, կառավարության մակարդակով հակաէկոլոգիական որոշումներ են լինում, այդ դեպքում հասարակությանը չես կարող էկոլոգիապես կրթել»,- ասում է բնապահպան Կարինե Դանիելյանը:

Անցյալ շաբաթ Կառավարությունը օրենքի նախագիծ ընդունեց ընդերքի վերաբերյալ, որը պետք է ներկայացնի Ազգային ժողով: Կարինե Դանիելյանն ասում է, որ ըստ Հայաստանի ստորագրած բոլոր միջազգային փաստաթղթերի` այդ օրինագիծը նախ պետք է քննարկվեր, ապա նոր ուղարկվեր Ազգային ժողով:

«Մեզ խիստ անհանգստացնում է, որ մենք իջել ենք մի մակարդակի, որ հումք և էժան աշխատուժ ենք մատակարարում զարգացած երկրներին: Պատահական չէ, որ համաշխարհային բանկն է մշակել դա: Համաշխարհային բանկի փորձագետների ձեռքերով մենք ամբողջ արդյունաբերությունը զրոյի հասցրինք»,- ասում է Կարինե Դանիելյանը:

Մինչդեռ Բնապահպանության նախարարության Բնապահպանական ծրագրերի կենտրոն ՊՈԱԿ-ի տնօրեն Վիկտոր Մարտիրոսյանը հակառակ կարծիքն ունի: «Ընդերքը պետք է շահագործվի, որովհետև յուրաքանչյուր երկիր պետք է իր բնական պաշարները օգտագործի: Երանի այն հասարակությանը, որ ունենա ընդերքշահագործում և չունենա խնդիրներ»,- ասում է նա:

Վիկտոր Մարտիրոսյանը նշում է, որ Ազգային ժողովը լսումների մի ամբողջ համակարգ ունի և չի ուզում վիճարկել այդ օրինագծի հրատապությունը:

«ՄԱՔՈՒՐ ՀԱՅՐԵՆԻՔ ՀՆԱՐԱՎՈՐ Է ԼԻՆԻ, ԵԹԵ ԱՌԿԱ Է ՄԱՔՈՒՐ ԲՆՈՒԹՅՈՒՆ»
Ինգա Մարտինյան, Հետք

Կառավարության որոշմամբ հաստատվել է «Մաքուր հայրենիք» ազգային ծրագիրը, ստեղծվել է միջգերատեսչական աշխատանքային խումբ: Շատերը դա դիտարկում են որպես աղբահանության ծրագիր, բայց իրականում աղբահանությունը «Մաքուր հայրենիքի» դրույթներից մեկն է միայն: Ծրագիրը նախատեսում է նաև հանրության լայն շերտերի ընդգրկմամբ կոնկրետ տարածքների մաքրում և բարեկարգում, ամենօրյա գործելակերպի մշակում, հետևողականության ու սրտացավ վերաբերմունքի սերմանում մաքուր բնակավայր, մաքուր հայրենիք ունենալու համար, ինչպես նաև երիտասարդ սերնդի էկոկրթության բարելավում, օրենսդրական դաշտի կատարելագրոծում, դերերի և պարտականությունների հստակեցում, էկոմշակույթի և ավանդույթների սերմանում:

«Մաքուր հայրենիք» ծրագրի իրականացումը բյուջեից լրացուցիչ ֆինանսավորում չի պահանջում. նախատեսվում է հիմնադրել «Մաքուր հայրենիք» ծրագրի բարեգործական ֆոնդ:

Բնապահպաններ Կարինե Դանիելյանը և Գոհար Օգանեզովան ողջունում են ծրագիրը` չնայած շատ բան նրանց համար դեռևս անհասականալի է: Կարինե Դանիելյանն ասում է, որ իրենց զարմացնում է փակ աշխատանքը այս ոլորտում, և որպեսզի հանրությունը վստահի ու մասնակցի ծրագրին, պետք է հրաժարվել իմիտացիոն հարցերից: Նա նշում է, որ եթե իրենք աշխատեին, ծրագրի վերնագիրը կլիներ «Մաքուր և կանաչ հայրենիք», որովհետև այդ երկու երևույթները փոխկապակցված են:

«Մաքուր հայրենիք հնարավոր է լինի, եթե առկա է մաքուր բնություն: Մարդը իրենից հետո աղբ է թողնում, ոչ մի այլ արարած այդպես չի անում: Պետք է ուշադրություն դարձնենք կանաչի վրա, նախ պետք է աղբը մաքրենք, հետո խոսենք մաքուր հայրենիքի մասին»,- ասում է Գոհար Օգանեզովան: Նա նշում է, որ Հայաստանում կա ընդամենը երկու արգելոց` Խոսրովն ու Շիկահողը, ընդ որում Խոսրովի արգելոցի մեջտեղում ռեստորան են բացել: «Մաքուր հայրենիքը» չպետք է դա թույլ տա:

Ասուլիսի մյուս բանախոսը` Բնապահպանության նախարարության Բնապահպանական ծրագրերի ՊՈԱԿ-ի տնօրեն Վիկտոր Մարտիրոսյանն, ասում է, որ իրենք չեն կարող արգելել մարդկանց գնալ և հանգստանալ բնության գրկում, բայց խնդիրն այն է, որ մարդը պետք է ունենա այնքան կուլտուրա, որ չկեղտոտի շրջակա միջավայրը:

«Էկոտուրիզմը երբեք չի ասում` ռեստորան կառուցիր: Դա հակասում է էկոտուրիզմին: Եթե մենք երկիրը ծածկում ենք թունավոր պոչամբարներով, սեյսմիկ անվտանգությունը չենք ապահովում, ապա մաքուր հայրենիքը մեզ չի փրկի: Ամբողջ երկիրը պոչամբարներով ծածկենք ու ասենք` «մաքուր հայրենիք»»,- ասում է Կարինե Դանիելյանը` հավելելով, որ Հայաստանում արդեն 15 պոչամբար կա:

Սեպտեմբեր 15, 2010


Առնչվող նյութեր


Կատեգորիա

ավելին
պակաս

Մարզեր