Արմանիսի հանքային դաշտի երկրաբանական ուսումնասիրության ծրագիրը ստացել է բացասական եզրակացություն

«ՍԱԳԱՄԱՐ» ՓԲԸ-ի կողմից ներկայացված՝ Լոռու մարզի Արմանիսի հանքային դաշտի արևմտյան և հարավ-արևելյան թևերում 2026-2029 թվականներին երկրաբանական ուսումնասիրության աշխատանքների շրջակա միջավայրի վրա ազդեցության գնահատման հաշվետվությունը ստացել է ՇՄԱԳ պետական փորձաքննության բացասական եզրակացություն։

ՀՀ շրջակա միջավայրի նախարարության գլխավոր քարտուղարի՝ 2026թ. օգոստոսի 28-ի՝ «Ստեփանավանն առանց հանքի» նախաձեռնությանը հասցեագրված պաշտոնական պատասխանի համաձայն՝ «Շրջակա միջավայրի վրա ազդեցության փորձաքննական կենտրոն» ՊՈԱԿ-ը տվել է N ԲՓ 112-26 պետական փորձաքննական բացասական եզրակացություն։ 

Հիշեցնենք, որ 2026 թ. հուլիսի 17-ին Լոռու մարզում անցկացվել էին «ՍԱԳԱՄԱՐ» ՓԲԸ-ի ներկայացրած ծրագրի ՇՄԱԳ հաշվետվության վերաբերյալ երկրորդ հանրային լսումները։ 

Հանրային լսումների ժամանակ քաղաքացիները, բնապահպանները և քաղաքացիական հասարակության ներկայացուցիչները դեմ են արտահայտվում Ստեփանավան համայնքն ու հարակից բնակավայրերը որպես հանքարդյունաբերական գոտի դիտարկելուն՝ նշելով, որ տարածաշրջանի զարգացման հեռանկարը տեսնում են զբոսաշրջության և կայուն գյուղատնտեսության ոլորտներում։ Միաժամանակ լսումներին ներկա են եղել նաև հանքարդյունաբերությանը կողմ բնակիչներ։

Օգոստոս 29, 2026 at 11:32