Ռեգնում տեղեկատվական գործակալություն
ՉԺՀ Կոմունիստական կուսակցության Կենտրոնական կոմիտեի քաղաքական բյուրոյի մշտական անդամ Լի Չանչունի նախորդ այցը Հայաստան էական խթան դարձավ հայ-չինական տնտեսական համագործակցության համար: Դրա հետ մեկտեղ չինական կողմի խոստացած ներդրումների զգալի ավելացումը վերաբերվում է առաջին հերթին հանքարդյունաբերության ոլորտին:
Չինացի մետաղագործների հետ համագործակցության մեծ ծրագրերն առաջացրեցին նույնքան մեծ անհանգստություն հայ էկոլոգների շրջանում: Չինացիներն առաջին հերթին կսկսեն շահագործել Հրազդանի երկաթահանքը (Կոտայքի մարզ, Հայաստան), որը մայրաքաղաքից` Երեւանից, գտնվում է մոտավորապես 55 կմ հեռավորության վրա: Հանքավայրից ոչ շատ հեռու` 600-700 մետր տարածության վրա, գտնվում են խմելու ջրի աղբյուրները, որոնք ջուր են մատակարարում Երեւանին, եւ մի շարք այլ քաղաքների եւ գյուղերի: Հենց այստեղից է Հայաստանի մայրաքաղաք հասնում խմելու ջրի 40%-ը, հաստատում է «Հանուն կայուն մարդկային զարգացման» ասոցիացիայի նախագահ Կարինե Դանիելյանը: Նրա խոսքերով` արդյունքում «մենք կամ կզրկվենք խմելու ջրից, կամ այն թունավորված կլինի տոքսիկ թափոններով»:
Դրան «ԷկոԼուր» գործակալությունն ավելացնում է, որ Հայակական տխնոլոգիական ակադեմիայում տվյալ խնդրի անցյալ քննարկման արդյունքների համաձայն` Հրազդանի երկաթահանքի բաց եղանակով շահագործման ծրագրին բացասական գնահատական է տրվել: Տեխնոլոգիական ակադեմիայի անդամ Գագիկ Ղազարյանի խոսքերով` այդ մտադրությունները ոչ մի ընդհանուր բան չունեն ինովացիոն տեխնոլոգիաների հետ, որոնց կարիքը Հայաստանն ամենից շատ ունի:
Ինչպես հաստատում է Էկոլոգոսոցիալական ասոցիացիայի ղեկավար Սրբուհի Հարությունյանը, չինական կողմը «կարող է ծանր վիճակի մեջ հայտնվել» քանի որ «ինչպես երեւում է` բավականաչափ տեղեկացված չէ Հրազդանի հանքավայրի շահագործումը թույլատրող փաստաթղթերի վիճակի մասին»: Ընդորում այդ փաստաթղթերը, պնդում է նա, «իրավական տեսանկյունից խոցելի են»:
Կա եւս մի նրբություն: Վերջերս հայկական կողմը միակողմանի կերպով մտցրել է հեշտացված վիզային ռեժիմ ՉԺՀ քաղաքացիների համար: Ակնհայտ է, որ դա արվել է տեղական հանքարդյունաբերության ոլորտում չինական կապիտալի ներդրման պլանների լույսի ներքո:
Ապրիլ 22, 2011