

Սյունաց Երկիր
Այս հայտարարության հեղինակը Քաջարանի գյուղապետ Ռաֆիկ Աթայանն է, ով նոյեմբերի 18-ին այցելել էր «Սյունյաց երկրի» խմբագրություն եւ տեղեկացրել, որ գյուղում (նաեւ ծագումով քաջարանցիների շրջանում) նոր ստորագրահավաք է մեկնարկում` ուղղված ՀՀ նախագահին, քանի որ նախորդ նամակին երկրի բարձրագույն ղեկավարությունն ըստ պատշաճի չի պատասխանել եւ գյուղի վերացման սպառնալիքը դեռեւս անցած չէ: Ըստ Ռաֆիկ Աթայանի` վերջին երկու ամսում բանակցություններ են տեղի ունեցել Մաքսիմ Հակոբյանի հետ, ձեռք բերվել որոշ պայմանավորվածություններ` խնդրի լուծման ողջամիտ տարբերակ գտնելու համար, բայց դրանք հետագայում կոմբինատի ղեկավարությունը չի կատարել: Քաջարան գյուղի շուրջ ծագած խնդիրը ս.թ. սեպտեմբերի 21-ին քննարկվել է նաեւ Երեւանում` շահագրգիռ մի շարք գերատեսչությունների ներկայացուցիչների, ինչպես եւ Քաջարանի գյուղապետի մասնակցությամբ, սակայն գյուղի փրկության մասին որեւէ սթափ խոսք չի հնչել այնտեղ: Այդ ընթացքում կոմբինատի տրակտորը` քանիցս գյուղի տարածք նեխուժած, դուրս է մղվել գյուղացիների կողմից: Նոյեմբերի 18-ին, ըստ Ռաֆիկ Աթայանի, իրեն է զանգահարել Մաքսիմ Հակոբյանը եւ հորդորել ստորագրել պայմանագիր` կառավարության հայտնի որոշմամբ հատկացված հողատարածքը կոմբինատին փոխանցելու նպատակով: Գյուղապետը, սակայն, մերժել է այդ առաջարկը, որից հետո տնօրենը սպառնացել է ոստիկաններով:
Վերջին շրջանում Քաջարանի կոմբինատը 20 մլն դրամ է փոխանցել Քաջարան գյուղի Սբ Հակովբ եկեղեցու վերաշինման ֆոնդին: Նոյեմբերի 22-ին խմբագրություն այցելած քաջարանցիները Մաքսիմ Հակոբյանի այդ ժեստը չեն համարում բարի կամքի դրսեւորում, այլ՝ չնչին փոխհատուցում` տարիներ շարունակ բաց հանքում կատարվող պայթեցումների հետեւանքով եկեղեցուն պատճառած վնասների:
Դեկտեմբեր 07, 2011 at 14:04
