Մեղրեցիները վստահ են, որ իրենց վատ ինքնազգացողության պատճառը բաց հանքերն են

Մեղրեցիները վստահ են, որ իրենց վատ ինքնազգացողության պատճառը բաց հանքերն են

ԷկոԼուր

Մեղրու տարածաշրջանի բնակչության մեծամասնությունը վստահ է, որ իրենց վատ զգալու հիմնական պատճառը բաց հանքերն են: Այդ մասին նրանք ասացին «ԷկոԼուր»-ի աշխատանքային խմբի հետ հանդիպման ժամանակ, որը Մեղրի էր մեկնել 2012թ. մայիսին: Այդպես մտածող մարդկանցից մեկին մենք հանդիպեցինք նրա այգում: 45-50 տարեկան մեղրեցին մշակում էր հողամասը` գործնականում առանց տեղաշարժվելու: Երբ նրան պետք էր լինում տեղաշարժվել, նրան օգնում էր մի երիտասարդ: Ստորեւ ներկայացնում ենք նրա հետ ունեցած մեր կարճ զրույցը:

Մեղրեցի.

- Հոդերի ցավից տառապում ենք, չենք կարողանում շարժվել:… Մեղրու մասին ոչ ոք չի մտածում, Մեղրու առողջապահության կամ մարդկանց մասին ընդհանրապես զբաղվող չկա: Մեծ ռայոն է, բայց ոչ մի բժիշկ չկա, միայն` քաղաքում: Չեմ աշխատում հիվանդության պատճառով արդեն 7-8 տարի: Էստեղ դիմելու բան չկա, միշտ էլ Երեւան եմ գնացել, ահավոր գումարներ եմ ծախսել, բայց ես ոչ մի արդյունքի չեմ հասել: Հիմա ես գնամ, ու՞մ դիմեմ, ասեմ` իմ կոմպենսացիան փակեք: Ահավոր վիճակի մեջ ենք, ոչ թե միայն ես, այլ ինձ նման շատ մարդիկ կան: Հոդերի ցավից տառապում ենք, չենք կարողանում շարժվել: Ես չգիտեմ` էս ռայոնի օդից է, ինչից է, այսպես տառապում ենք: …Մեր սարերը, մեր այս ճառագայթները, դրանից է կախված:

ԷկոԼուր.

-Իսկ ինչի՞ց որոշեցիք, որ ճառագայթումից է:

Մեղրեցի.

- Գրականությունից: Մեղրու մասին բաներ կա գրված, որ կարդում ես, տեսնում ես, որ հողի տակից դուրս եկած էդ ուրանը, էդ հանքերը, էդ բաները լռիվ մարդու առողջության վրա ազդում են: 

ԷկոԼուր

-Դուք կամ Ձեր ծանոթները աշխատե՞լ եք հանքերում:

Մեղրեցի.

-Մեղրում ով ծանոթ չունի, բոլորն էլ աշխատում են:

ԷկոԼուր

-Իսկ Դուք որեւէ օգնություն ստացե՞լ եք, ունե՞ք սոցիալական պաշտպանություն:

Մեղրեցի.

-Չէ, ես նման բան չեմ տեսնում: Իմ պաշտպանությունն այն է, որ 15 տարի է, այսպես հիվանդ եմ, վերջին 7-8 տարում պետությունն ինձ մի 20 հազար թոշակ է տալիս: Ոչ մի տեղ հնարավորություն չունեմ աշխատելու: (20000-hիվանդության թոշակն է, հաշմանդամության` 2-րդ կարգի հաշմանդամ է): Ամենապակասը ես ինձ համար մի 16-17 հազարի դեղ եմ առնում, որ կարողանամ ոտքի վրա կանգնեմ:

ԷկոԼուր

Իսկ ինչ-որ մեկը եկե՞լ է, հետազոտե՞լ է, նման ծրագրեր եղե՞լ են ընդհանրապես:

Մեղրեցի.

Չէ, ես էդպիսի բան չեմ տեսել: Մեղրին շատ կտրված տեղ է, ոչ մեկն էլ չի հետեւում:

ԷկոԼուր

Իսկ կցանկանայի՞ք դիմել կառավարությանը եւ ի՞նչ պահանջով:

Մեղրեցի.

Ես որպես բնակիչ, ոչ միայն իմ, այլ բոլորի անունից եմ ասում, որ գոնե մի քիչ հետեւողական լինեն մեր բնակչության հիվանդությունների դեմ: Դեմը առնելը արդեն դժվար կլինի, դեմն առնելը սուտ է, որովհետեւ հնարավոր չի այդ մեծ հանքերը փակել, բայց գոնե ինչ-որ ձեւով այդ ճառագայթները, բաները մեղմացնեն, քչացնեն: Էս մարդիկ մեղք են:



Հուլիս 10, 2012 at 19:39


Առնչվող նյութեր


Կատեգորիա

ավելին
պակաս

Մարզեր