ԷկոԼուր
Քաջարանի հանքավայրի խոռոչում անձրևներից, ձնհալից կուտակված ջրերը մտադիր են ջրատար-թունելով ուղղել Ողջի գետ, ԷկոԼուրին ահազանգեց Հայաստանի կանաչների միության նախագահ, քիմիկոս Հակոբ Սանասարյանը:
Ըստ Հակոբ Սանասարյանի՝ ջրատար-թունելի կառուցումը սկսել են գետի կողմից: «Հանքային խոռոչի ջուրը վերցնել ու լցնել գետը նշանակում է, որ դուք գետ եք լցնում ծանր մետաղներով վարակված ջուր: Դրա համար պետք է լինի նախագիծ և այն պետք է անցնի փորձաքննության տարբեր մակարդակներով, վերջում էլ էկոլոգիական փորձաքննություն, որից հետո նոր պարզ կլիներ՝ կարելի է դա անել, թե՝ ոչ: Ես փնտրեցի և որևէ տեղ չտեսա նման նախագիծ», - ասաց Հակոբ Սանասարյանը:
Հանքավայրի խոռոչում կուտակված ջրերում պարունակվում են բոլոր այն ծանր մետաղների աղերը, որոնք առկա են Քաջարանի պղնձամոլիբդենային հանքաքարի մեջ: Պղինձ, մոլիբդեն, ոսկի, արծաթ, բիսմուտ, ռենիում, սելեն, տելլուր, վանադիում եւ այլն: Այս մետաղներն ու միացությունները բնորոշ են Քաջարանի հանքաքարին: Ըստ Հակոբ Սանասարյանի՝ այս կազմը չի բացառում նաեւ ուրանի միացությունների առկայությունը:
Մայիս 18, 2016 at 19:41