ԱրմԻնֆո
ԼՂՀ Մարտակերտի շրջանի Մաղավուզ գյուղի քարածխի հանքավայրում քարածխի ծավալների ուսումնասիրմանը նպատակաուղղված հետազոտություններն առաջիկա տարիներին կշարունակվեն: Այդ մասին հայտարարել է Հայաստանի էներգետիկայի և բնական պաշարների նախարար Արմեն Մովսիսյանը Հանրային հեռուստատեսությամբ հեռարձակված հարցազրույցում:
Այդուհանդերձ, նրա ասելով, արդեն այսօր ակնհայտ է, որ Լեռնային Ղարաբաղում բավականաչափ քարածխի պաշար կա Երևանի ՋԷԿ-ի հին էներգաբլոկի վերագործարկման նախագծի իրագործման համար: Ինչպես նշել է նախարարը, 2 տարի առաջ ՋԷԿ-ում շահագործման հանձնվեց նոր, շոգեգեներատորային կայանքով ժամանակակից բլոկը, ինչը թույլ տվեց աշխատանքի ռեժիմից դուրս բերել հին, տնտեսապես անարդյունավետ բլոկը: Սակայն Հայաստանի նախագահ Սերժ Սարգսյանը Էներգետիկայի և բնական պաշարների նախարարությանը կարգադրել է հետազոտություն անցկացնել հին էներգաբլոկի օգտագործման հնարավորությունը պարզելու նպատակով: ՙՄեզ անհրաժեշտ էր գտնել նաև ինժեներային լուծումներ, որոնք թույլ տային նվազագույն կորուստներով օգտագործել հին բլոկը: Արդյունքում` ընտրությունը կանգ առավ ԼՂՀ Մարտակերտի շրջանի Մաղավուզ գյուղի քարածխի հանքավայրի քարածխի օգտագործման վրա: Հենց այստեղից է նախատեսվում ամեն օր մինչև 2 հազար տոննա քարածուխ մատակարարել Երևանի ՋԷԿ-ի հին բլոկ, որից կարտադրվի էլեկտրաէներգիայի արտադրության համար անհրաժեշտ ածխաջրածին: Նախագիծն զգալի է ինչպես ֆինանսական, այնպես էլ ներդրումային և կազմակերպական տեսանկյունից: Նմանօրինակ նախագծերը նոր են սկսում կիրառել աշխարհում, նշել է նախարարը: Աշխատանքի արդյունքում հանրապետությունը կստանա համեմատաբար էժան էլեկտրաէներգիայի լրացուցիչ հզորություններ, ինչը թույլ կտա ինչպես այն արտահանել, այնպես էլ օգտագործել ներքին շուկայում: Վերջնական արդյունքում այդ նախագծի իրագործումը թույլ կտա մեղմել էներգակիրների համաշխարհային գների հերթական թռիչքի հետևանքները՚, - ասել է նա:
Հիշեցնենք, որ Ղարաբաղում քարածխի պաշարների առկայությունը հաստատվել էր դեռ1980-ական թվականների վերջում անցկացված հետազոտությունների արդյունքում: ԼՂՀ վարչապետ Արա Հարությունյանի հավաստմամբ, նախագծի իրագործումը կդառնա Ղարաբաղի և Հայաստանի էներգետիկ անկախության լուրջ ծրագրերից մեկը, քանի որ այսօր ջեռուցման և էլեկտրաէներգիայի ստացման համար հիմնական վառելիքը, գազից հետո, համարվում է քարածուխը: Հանքավայրի շահագործումը լուրջ հարստություն կդառնա Արցախի համար, հայտարարել է Հարությունյանը:
Հունվար 12, 2012 at 14:29