ԷկոԼուր
ԷկոԼուրը շարունակում է ներկայացնել Հայաստանի մետաղական հանքերը շահագործող ընկերությունների իրական սեփականատերերի վերաբերյալ հայտարարագրերը, որոնք հրապարակվել են Արդյունահանող ճյուղերի թափանցիկության նախաձեռնության շրջանակներում՝ ՀՀ արդարադատության նախարարության իրավաբանական անձանց պետական ռեգիստրի գործակալության կայքում:
Այս հրապարակման մեջ կանդրադառնանք Սյունիքի մարզում Ագարակի պղնձամոլիբդենային հանքավայրը և կոմբինատը շահագործող «Ագարակի պղնձա-մոլիբդենային կոմբինատ» ՓԲԸ-ի հայտարարագրին:
Հայաստանի հարավային հանքավայրի ռուս սեփականատերերը
«Ագարակի ՊՄԿ» ՓԲԸ-ն ռուսական «ԳեոՊրոՄայնինգ» խմբի ակտիվներից է, գրանցվել է 1995 թ-ի մայիսի 12-ին:
Հայտարարագրում բացահայտված առաջին, երկրորդ և երրորդ իրական սեփականատերերը խմբի մեջ մտնող մեկ այլ ընկերության՝ Սոտքի ոսկու հանքը շահագործող «Գեոպրոմայնինգ Գոլդ» ՍՊԸ-ի առաջին երեք իրական սեփականատերերն են: Նրանցից երկուսը, ինչպես «Գեոպրոմայնինգ Գոլդ»-ում, գերիշխում են իրենց բաժնեմասերով: Ավելին, նույնն է բաժնեմասերի տոկոսը և ձեռք բերման ժամանակահատվածը:
Այսպես, առաջին իրական սեփականատերը ռուս մեծահարուստ Սիման Պովարենկինն է՝ 50.3205% բաժնեմասով, որոնք նա ձեռք է բերել 2010 թ-ի սեպտեմբերի 29-ին: Երկրորդ իրական սեփականատերը մեկ այլ ռուս մեծահարուստ Ռոման Տրոցենկոն է՝ 48.1863% բաժնեմասով, որոնք նա ձեռք է բերել 2019 թ-ի մարտի 27-ին: Իսկ երրորդ իրական սեփականատերը «ԳեոՊրոՄայնինգ» խմբի գլխավոր տնօրեն Ռոման Խուդոլին է, որի բաժնեմասի վերաբերյալ տեղեկատվություն հայտարարագրում չկա:
Բացի նշվածներից, հայտարարագրում կա ևս երկու անուն:
Որպես չորրորդ իրական սեփականատեր բացահայտված է «Ագարակի ՊՄԿ» ՓԲԸ-ի գլխավոր տնօրեն Անդրեյ Սինյակովը: Որպես հինգերորդ իրական սեփականատեր բացահայտված է Անդրեյ Կիշկինսկին, ով «ԳեոՊրոՄայնինգ» խմբի բիզնեսի պլանավորման, ռազմավարության և զարգացման գծով տնօրենն է: Նրանց երկուսի բաժնեմասերի վերաբերյալ տեղեկատվություն հայտարարագրում չկա:
Այսպիսով, ինչպես «ԳեոՊրոՄայնինգ Գոլդի»-ի, այդպես էլ «Ագարակի ՊՄԿ»-ի մոտ 1.5 % բաժնեմասի իրական սեփականատերը մնում է անհայտ:
Նշենք, որ ԱՃԹՆ-ի շրջանակներում ընկերությունը չունի պարտավորություն բացահայտելու 10 տոկոսից պակաս բաժնեմաս ունեցող սեփականատիրոջը:
Ռուս սեփականատերերի միջանկյալ ընկերությունները
Հայտարարագրում նշված են միայն բացահայտված բաժնեմասերով առաջին երկու իրական սեփականատերերի միջանկյալ ընկերությունները:
Առաջին իրական սեփականատեր Սիման Պովարենկինի համար որպես միջանկյալ ընկերություններ գործում են Մեծ Բրիտանիայում գտնվող «Ջեիզեր Ասսեթ Հոդինգս ԼԹԴ (Բի Վի Ալ)»-ը, Կիպրոսում գտնվող «Գեոպրոմայնինգ Ինվեսթմենթ (ՍԻՓ) Լիմիթեդ»-ը և Նիդեռլանդներում գտնվող «Կառլոու Բ.Վ»-ն:
«Գեոպրոմայնինգ Ինվեսթմենթ (ՍԻՓ) Լիմիթեդ»-ը, «Կառլոու Բ.Վ»-ն որպես միջանկյալ ընկերություններ գործում են նաև երկրորդ իրական սեփականատեր Ռոման Տրոցենկոյի համար: Նրա համար որպես միջանկյալ ընկերություն է գործում նաև Կիպրոսում գտնվող «Նակիլեպ Օվերսիզ Լիլիթեդ (Կիպրոս)»-ը:
Մայիս 22, 2020 at 17:17