Չինական ընկերության խոստացած ներդրումները դեռեւս չեն կատարվել

Անուշ Մարտիրոսյան, «Ազատություն» ռադիոկայան

Չինական Fortune Oil ընկերությունը դեռեւս չի վճարել 24 միլիոն դոլար գումարը հայկական «Նագին» ընկերության բաժնետոմսերի 35 տոկոսի ձեռք բերման դիմաց:

Այս գործարքի առնչությամբ լրատվամիջոցների ուշադրությունը սեւեռվել էր բնապահպանության նախկին նախարար, այժմ Ազգային ժողովի Տնտեսական հարցերի մշտական հանձնաժողովի նախագահ Վարդան Այվազյանի վրա:

«Հետք» պարբերականի հրապարակած տեղեկատվության համաձայն, մինչ այժմ անհայտ «Նագին» ընկերության բաժնետերեր են Վարդան Այվազյանի որդին` Սուրեն Այվազյանը, եւ պատգամավոր Տիգրան Արզաքանցյանը:

«Ոչ մի միլիոն էլ չեն տվել, որ 35 տոկոսը վերցնեն», - «Ազատություն» ռադիոկայանի հետ զրույցում այսօր ասաց Վարդան Այվազյանը` հավելելով, որ գործարքը ընթացքի մեջ է:

Փետրվարին, հանդիպելով Հայաստանի վարչապետ Տիգրան Սարգսյանի հետ, Fortune Oil ընկերության ներկայացուցիչը հայտարարել էր, որ իրենք պատրաստվում են շուրջ կես միլիարդ դոլարի ներդրումներ իրականացնել Հայաստանի հանքահումքային ոլորտում:

Մայիս 02, 2011 at 16:02