Հունվարի 15-ին ավարտվեց Սևանա լճից, սիգի ձվադրման ժամանակահատվածով պայմանավորված, այս ձկնատեսակի որսի արգելքին միտված հսկողության ուժեղացված միջոցառումների ծրագիրը: Սակայն սա չի նշանակում, որ եթե պետական մարմինները հսկողությունը թուլացնում են, ապա կարելի է սիգ որսալ: Ինչպես հայտնում են Շրջակա միջավայրի նախարարությունից, Սևանա լճում արդյունագործական ձկնորսության որսաշրջանն ավարտվել է 2021 թվականի հոկտեմբերի 15-ին մինչև ՀՀ կառավարության որոշմամբ նոր որսաշրջանի մեկնարկը։
Հունվարի 17-ին ՀՀ շրջակա միջավայրի նախարարությունում տեղի է ունեցել քննարկում նախարար Հակոբ Սիմիդյանի գլխավորությամբ, «Սևան» ազգային պարկի, ՀՀ տարածքային կառավարման և ենթակառուցվածքների նախարարության, ՀՀ ոստիկանության, Երևան քաղաքի դատախազության, Գեղարքունիքի մարզպետարանի, ՀՀ բնապահպանության և ընդերքի տեսչական մարմնի, Երևանի քաղաքապետարանի և ՀՀ ԳԱԱ կենդանաբանության և հիդրոէկոլոգիայի կենտրոնի ներկայացուցիչների մասնակցությամբ: Ամփոփվել են խիստ վերահսկողության համատեղ միջոցառումների ծրագրի արդյունքները:
Վերահսկողական միջոցառումների արդյունքում առգրավվել է 2667 հատ սիգ տեսակի ձուկ՝ 1044 կգ ընդհանուր քաշով, լճից դուրս է բերվել 111 հատ ձկնորսական պոլիէթիլենային ցանց, հաշվարկել է շրջակա միջավայրին հասցված վնաս՝ 5․221․500 ՀՀ դրամի չափով:
Նախապատրաստվում են նյութեր ՀՀ քրեական օրենսգրքի 292 հոդվածի հատկանիշներով (թվով 29) և «Վարչական իրավախախտումների վերաբերյալ» ՀՀ օրենսգրքի 89 հոդվածի հատկանիշներով (թվով 2)։
ՀՀ շրջակա միջավայրի նախարար Հակոբ Սիմիդյանը հիշեցրել է խիստ վերահսկողական միջոցառումների ավարտից հետո սիգի որսի արգելքի մասին և խնդրել նույն աչալրջությամբ ու սրտացավությամբ մոտենալ համազգային կարևորության այս խնդրին։
Նշենք, որ վերջին 9 տարիների ընթացքում Սևանա լճում սիգի պաշարի ամենամեծ ցուցանիշը գրանցվել է 2021 թվականին՝ ըստ ՀՀ ԳԱԱ կենդանաբանության և հիդրոէկոլոգիայի կենտրոնի տվյալների: 2013 թվականին սիգի ընդհանուր կենսազանգվածը կազմել է 1296 տոննա, արդյունագործական զանգվածը՝ 324 տոննա: Տարիների ընթացքում սիգի պաշարն ավելացել է՝ 2018 թվականին կազմելով 2948 տոննա, արդյունագործական պաշարը՝ 737 տոննա: Այնուհետև, 2019 և 2020 թվականներին սիգի պաշարը սկսեց նվազել՝ 2019 թվականին կազմելով 2668 տոննա, արդյունագործական պաշարը՝ 667 տոննա, իսկ 2020 թվականին՝ 2345 տոննա, որից արդյունագործական պաշարը՝ 586.25 տոննա:
2021թ. սիգի ընդհանուր պաշարը կազմել է 5348,32 տոննա, որից արդյունագործական պաշարը՝ 641.80 տոննա: ՀՀ ԳԱԱ կենդանաբանության և հիդրոէկոլոգիայի կենտրոնի տնօրեն Բարդուխ Գաբրիելյանը ԷկոԼուրին հայտնել է, որ սիգի պաշարների ավելացման պատճառները 2020թ. բռնկված կորոնավիրուսային համավարակն ու 44-օրյա պատերազմն էին:
Սևանա լճում կենսառեսուրսների հաշվարկն ԳԱԱ կենդանաբանության և հիդրոէկոլոգիայի գիտական կենտրոնն իրականացրել է Շրջակա միջավայրի նախարարության հետ կնքած պայմանագրի շրջանակներում:
Հունվար 18, 2022 at 10:56