Ներկայում Սևանա լճի էկոհամակարգի պահպանության համար Հայաստանում միջազգային երկու՝ «Սևանա լճի շրջակա միջավայրի պաշտպանություն» (EU4Sevan) և SEVAMOD2 «Սևանա լճի համար գիտության վրա հիմնված կառավարման գործիքների ստեղծում» ծրագրերն են իրականացվում: Ծրագրերի արդյունքների քննարկման վերաբերյալ Շրջակա միջավայրի նախարարությունում օրերս երկու հանդիպում է տեղի ունեցել:
Մայիսի 13-ին նախարար Հակոբ Սիմիդյանը հանդիպել է Շրջակա միջավայրի հետազոտությունների Հեմհոլցի կենտրոնի լճային հետազոտությունների բաժնի ղեկավար, դոկտոր Կառստեն Ռինկեին: Հանդիպմանը մասնակցել են նախարարի տեղակալ Արամ Մեյմարյանը, «Հիդրոօդերևութաբանության և մոնիթորինգի կոնտրոն» ՊՈԱԿ-ի տնօրեն Լևոն Ազիզյանը և ԳԱԱ Կենդանաբանության և հիդրոէկոլոգիայի գիտական կենտրոնի տնօրեն Բարդուխ Գաբրիելյանը։ Կառստեն Ռինկեն ներկայացրել է SEVAMOD2 «Սևանա լճի համար գիտության վրա հիմնված կառավարման գործիքների ստեղծում» ծրագիրը, որը ֆինանսավորվում է Գերմանիայի Կրթության և գիտության դաշնային նախարարության կողմից։ Կողմերը քննարկել են ծրագրի ընթացքը, Կառստեն Ռինկեն ներկայացրել է արդեն իսկ կատարված աշխատանքները։ Գերմանիայի կառավարության կողմից ֆինանսավորվող SEVAMOD2 «Սևանա լճի համար գիտության վրա հիմնված կառավարման գործիքների ստեղծում» հայ-գերմանական ծրագիրը հնարավորություն է տվել իրականացնել Սևանա լճի համապարփակ մոնիթորինգային և գիտահետազոտական աշխատանքներ (որոնք մինչ այժմ իրականացվում էին ոչ ամբողջական պետական ֆինանսավորման բացակայության պատճառով)՝ միավորելով գերմանական, ՀՀ գիտական և պետական կառույցների հնարավորությունները։ Ծրագրի ավարտից հետո Շրջակա միջավայրի նախարարությանը կներկայացվի առաջարկների ամբողջական փաթեթ, որը կօգնի բացահայտել Սևանա լճի ջրի որակի հիմնական խնդիրները և առավել արդյունավետ իրականացնել ջրային ռեսուրսների կառավարումը։
Մայիսի 16-ին էլ Շրջակա միջավայրի նախարարի տեղակալ Արամ Մեյմարյանը հանդիպել է «Սևանա լճի շրջակա միջավայրի պաշտպանություն» (EU4Sevan) ծրագրի թիմի ղեկավար Քրիստիան Հենշելի և ծրագրի ՄԱԶԾ բաղադրիչի համակարգող Աստղիկ Դանիելյանի հետ։ Հանդիպմանը ներկայացվել է ծրագրով իրականացված աշխատանքների հաշվետվությունն ըստ բաղադրիչների։ «EU4Sevan» ծրագրի թիմի ղեկավար Քրիստիան Հենշելը ներկայացրել է Սևանա լճի շրջակա միջավայրի պաշտպանության ծրագրի շրջանակներում իրականացված աշխատանքների արդյունքները: Դրանք մասնավորապես նպաստել են Սևանա լճի ավազանում ջրի մոնիթորինգի ու կառավարման կարողությունների հզորացմանը, բարելավել են էկոհամակարգի համար բարենպաստ և ջուր խնայող հողօգտագործման ու մշակման գործողությունների իրականացման կարողությունները, Սևանա լճի էկոհամակարգի կառավարումը, կոյուղաջրերի մաքրման գործընթացը Սևանա լճի շրջակայքում, ներառյալ բնահեն եղանակով, ու զարգացրել դրանում ընդգրկված անձնակազմի կարողությունները, բարձրացվել է բնապահպանական իրազեկումը: Աստղիկ Դանիելյանը ներկայացրել է ծրագրի ՄԱԶԾ բաղադրիչի նպատակն ու գործունեության 4 ուղղությունները, այն է՝ թարմացված քաղաքական կարգավորիչ և ինստիտուցիոնալ դաշտ, Սևանա լճի էկոհամակարգի կառավարման և բնական ռեսուրսների կայուն օգտագործման «Սևան» ազգային պարկի կառավարման կազմ, երկարաժամկետ զարգացման պլանավորմանը նպաստող միջավայր, այն է՝ երկարաժամկետ պլանների ձևավորման հիմքերի ստեղծում, ճանապարհային քարտեզի մշակում, տեխնիկական աջակցություն՝ հեղեղված տարածքների մաքրման և անտառվերականգման գործողությունների պլանավորման համար։
Մայիս 18, 2022 at 10:07