Կասեցվել է Սևանա լճի ազդեցության գոտում գործող ասֆալտբետոնի արտադրամասի գործունեությունը

Բնապահպանության և ընդերքի տեսչական մարմինը (ԲԸՏՄ) հոկտեմբերի 2-ին կասեցրել է Ծովագյուղ բնակավայրում՝ Սևանա լճից 1560 մ հեռավորության վրա գործող գործող ասֆալտբետոնի արտադրամասի աշխատանքները՝ մթնոլորտ արտանետվող թունավոր նյութերի քանակի գերազանցման և Սևանա լճի պահպանությանն առնչվող օրենքների խախտման հիմքով։

Որոշումն ընդունվել է «Հետք» լրատվական կայքի օգոստոսյան հետաքննական հոդվածից հետո իրականացված ստուգման արդյունքում և ուղարկվել է Հարկադիր կատարումն ապահովող ծառայություն՝ կատարումն ապահովելու նպատակով:

Ի՞նչ է բացահայտել ստուգումը

ԲԸՏՄ-ն սեպտեմբերի 4–18-ը ստուգում է իրականացրել «ՍԱՆԻ ԼԵՆԴ» ՍՊԸ-ի տարածքում գործող «Ծովագյուղի ՃՇՇ» ՍՊԸ-ի ասֆալտբետոնի արտադրամասում։ Ստուգման ժամանակ արտանետումների չափագրումները ցույց են տվել թույլատրելի նորմերի խախտումներ.

- Ածխածնի օքսիդի (CO) արտանետումները գերազանցել են անշարժ աղբյուրներից մթնոլորտ արտանետման թույլտվության չափաքանակները:

- Բարձր կոնցենտրացիայի ծծմբային անհիդրիդ (SO₂) է հայտնաբերվել, որի արտանետումը ընկերության սահմանային թույլատրելի արտանետումների թույլտվությամբ նախատեսված չէ։

Իրավական հիմքեր

«Սևանա լճի մասին» ՀՀ օրենքի 10-րդ հոդվածի 2-րդ մասի «ա» կետով Սևանա լճի անմիջական ազդեցության գոտում արգելվում են էկոլոգիապես վնասակար, օրենքով սահմանված նորմերը գերազանցող արտանետումները:

Հիմք ընդունելով «Բնապահպանական վերահսկողության մասին» ՀՀ օրենքի 29.1 հոդվածի 1-ին մասի 9-րդ կետը՝ ԲԸՏՄ Գեղարքունիքի տարածքային բաժնի պետը հոկտեմբերի 2-ին կայացրել է արտադրամասի գործունեության կասեցման որոշում։

Ընկերության տնօրենը ենթարկվել է վարչական պատասխանատվության:

«Էկոլուրն» ավելի վաղ գրել էր, որ նույն տարածքում «Սանի Լենդը» նաև ցեմենտի, գիպսի և հանքային փոշու արտադրություն էր նախատեսում: Սեպտեմբերի 18-ին շրջակա միջավայրի վրա ազդեցության պետական փորձաքննությունն այդ ծրագրին տվել է բացասական եզրակացություն: