Արմավիրի մարզի Վաղարշապատ խոշորացված համայնքի Էջմիածին քաղաքի բնակիչները «ԷկոԼուր» տեղեկատվական ՀԿ-ին ահազանգել են Սուրբ Էջմիածնի Մայր տաճարի հարակից կանաչ գոտում առողջ ու կանգուն ծառերն արմատախիլ անելու մասին: Ըստ բնակիչների՝ ծառերի վնասումն իրականացնում են հիմնականում գիշերվա ժամերին:
«Ծառերն արմատախիլ անելով Մայր Աթոռի բակը վերածում են անապատի: Այս պահին շինարարական աշխատանքներ են տարվում: Թող էլի կանաչապատում անեին, բայց այդ ծառերը ափսոս էին», - նշել են բնակիչները:
ԷկոԼուրի հետ զրույցում Մայր Աթոռի տեղեկատվական համակարգի տնօրեն Տեր Եսայի քահանա Արթենյանն ասաց, որ վանական համալիրի տարածքում որևէ առողջ ծառ չի տեղահանվել: «Նկարներում ներկայացված հատվածում նախկինում տուաներ են եղել, ոչ թե ծառեր: Մեկ այլ նկարում, որտեղ ահազանգում են, թե ծառեր չկան, այդ ծառերը հիմա էլ կան, այն նկարում, ուր ամայի տարածք է՝ ուրիշ տեղ է: Այդ աշխատանքների շրջանակում ծառ չի հանվել, եղել են չորացված ծառեր, որոնք տեղահանվել են, և տեղը նոր ծառեր են տնկվելու: Կանաչապատ տարածքն է վերականգնվելու, ավելի գեղեցիկ տարածք պետք է դառնա»,- նշեց նա:
Նոյեմբեր 11, 2022 at 16:16