ԷկոԼուր
Բնապահպանության նախարար Արամ Հարությունյանը Թեղուտի հանքավայրի վերաբերյալ որեւէ փաստաթուղթ չի ստացել, եւ կաշկանդված չէ քաղաքացիական հասարակության կողմից ՀՀ դատախազությանը տրամադրված հանցագործության մասին հաղորդումից: «Մեզ որեւէ փաստաթուղթ չի ներկայացվել: Երբ որ մեզ կներկայացվի փաստաթուղթ, այն ժամանակ մենք պաշտոնական մեր դիրքորոշումը կհայտարարենք: Եթե մեզ ներկայացվի փաստաթուղթ, ապա այդ փաստաթղթով ենթադրվում է լսումների ընթացակարգ, մասնագիտական լսումների ընթացակարգ, անկախ փորձագետների: Հենց որ մեզ ներկայացնեն, մենք էլ կաշկանդված չենք հանրությանը ներկայացնելու, կարծիքները հավաքելու, մասնագիտական քննարկում անելու, անկախ փորձագետ ներգրավվելու եւ այսպես շարունակ»,- այս մասին դեկտեմբերի 26-ին Բնապահպանության նախարարությունում տեղի ունեցած տարեվերջյան մամուլի ասուլիսի ժամանակ ասաց նախարար Արամ Հարությունյանը: Հիշեցնենք, որ սույն թվականի դեկտեմբերի 21-ին «Թեղուտի պաշտպանության» քաղաքացիական նախաձեռնությունը հանցագործության մասին հաղորդում ներկայացրեց ՀՀ դատախազություն: Ակտիվիստները «ACP» ընկերությանը մեղադրում են Թեղուտի պղնձամոլիբդենային հանքավայրն անօրինական շահագործելու մեջ` որպես հիմնավորում ներկայացնելով` «Environmental Resource Management» (ERM) կազմակերպության ուսումնասիրությունների արդյունքները, որոնց համաձայն ընկերությունը Թեղուտի հանքավայրի շահագործման աշխատանքներն իրականացնում է ոչ թե 2006թ. ՀՀ բնապահպանության նախարար Վարդան Այվազյանի կողմից հաստատված ՇՄԱԳ-ով, այլ 2010 թվականին կազմված նոր նախագծով, որը չի անցել օրենքով սահմանված ընթացակարգերը և չի ենթարկվել բնապահպանական փորձաքննության:
Դեկտեմբեր 26, 2012 at 15:06