ԷկոԼուր
«Ագարակի պղնձամոլիբդենային կոմբինատ» ՓԲԸ-ն պատրաստվում է ընդլայնել Ագարակի պղնձամոլիբդենային կոմբինատի N1՝ «Դավազամի» պոչամբարի տարածքը՝ 93 հեկտարից հասցնելով 128 հեկտարի: Պոչամբարի ընդլայնումը պայմանավորված է 2010թ-ից Ագարակի պղնձամոլիբդենային կոմբինատի արտադրողականության բարձրացմամբ (3.5 մլն.տ/տարի):
Նախատեսվում է պոչամբարի պատնեշի նիշը 810 մ-ից բարձրացնել մինչեւ 920 մ և 16 տարվա ընթացքում ՝ 3.5մլն.տ/տարի արտադրողականության դեպքում պոչամբարում կուտակել 40.8 միլիոն խմ պոչ: 01.01.2014թ. դրությամբ «Դավազամի» պոչամբարում կուտակվել է 36.8 մլն.մ3 պոչ:
Ներկայումս «Դավազամի» պոչամբարը, որը շահագործման է հանձնվել 1963թ-ին, գրեթե սպառել է իր ծավալը, իսկ կոմբինատի երկու մյուս պոչամբարներն ունեն ավելի փոքր տարողություններ և չեն կարող ապահովել պոչերի պահեստավորման համար անհրաժեշտ ծավալը: Նախագծով նախատեսվում է 3 փուլով շահագործել բոլոր 3 պոչամբարները:
Նախատեսվում է նաեւ վերականգնել պոչամբարի ջրի շրջանառու համակարգը: Ներկայումս պոչամբարի կեղտաջրերը թափվում են անդրսահմանային Արաքս գետը:
Պոչամբարի տարածքը գտնվում է 9 բալանոց սեյսմիկ գոտում:
Ռեկուլտիվացման ընդհանուր տարածքը, ներառյալ պոչամբարի ենթակառուցվածքները, կազմելու է 137.57 հա:
Պոչամբարի համար անհրաժեշտ հողերի օգտագործման ձևը նախատեսված է վարձակալության պայմաններով՝ 25 տարի ժամկետով:
Լուսանկարը վերցված է «Ագարակի պղնձամոլիբդենային կոմբինատ» ՓԲԸ-ի «N1 պոչամբարի ընդլայնում» նախագծից:
Հունիս 08, 2016 at 17:48