Ստորագրահավաք Արտաշար համայնքում՝ բնակիչների ջրի նկատմամբ խախտված իրավունքները վերականգնելու պահանջով

Ստորագրահավաք Արտաշար համայնքում՝ բնակիչների ջրի նկատմամբ խախտված իրավունքները վերականգնելու պահանջով

ԷկոԼուր

ՀՀ Արմավիրի մարզի Արտաշար համայնքի բնակիչները ստորագրահավաք են սկսել, որպեսզի նամակով դիմեն ՀՀ կառավարությանը՝ ջրի նկատմամբ իրենց խախտված իրավունքները վերականգնելու պահանջով: Բնակիչները բարձրաձայնել են ոռոգման և խմելու ջրի խնդիրները:

Նամակում նշված է.

«Հարգելի պարոն վարչապետ, կառավարության հարգելի անդամներ,
դիմում ենք ջրի նկատմամբ մեր իրավունքների վերականգնման համար:
Վերջին 10-15 տարիներին Արարատյան ավազանի ստորերկրյա ջրերի ձկնաբուծության նպատակով անխնա և անսահմանափակ օգտագործման հետևանքով մեր համայնքում առաջացել է սակավաջրություն, իջել են խորքային հորերի մակարդակները, կամ ամբողջովին ցամաքել են դրանք։ Սև ջուր գետը, որը համայնքն ապահովում էր ոռոգման ջրով, ցամաքել է:

Տարիներ շարունակ Մեծամոր, Արմավիր քաղաքների կոյուղաջրերը հոսում են մեր համայնքի ոռոգման համակարգ և այդ ջրերով ոռոգված մեր մշակովի հողատարածքներից ստացվող բերքը շուկայում դարձել է անմրցունակ։ Այդ ջրերն ամռանը համայնքում տարածում են գարշահոտություն և ստեղծում հակասանիտարական վիճակ: Մեզ վստահեցնում են, որ խնդիրը կլուծվի, քանի որ KFW բանկի «Համայնքային ենթակառուցվածք Ծրագիր II, փուլ 3» ծրագրի շրջանակներում նախատեսվում է կառուցել կենսաբանական մաքրման կայան։ Սակայն այդ աշխատանքները ինչ-ինչ պատճառներով ձգձգվում են, և ակնհայտ է, որ այս տեմպերով շարունակվելու դեպքում մենք երկար տարիներ կմնանք նույն խնդրի առաջ։

Արտաշարում որպես խմելու ջուր օգտագործում ենք արտեզյան ջրերը: Նախկինում խմելու ջուրը եղել է ինքնահոս, ներկայումս ջրերի հորիզոնների իջեցման պատճառով խմելու ջուրն արտամղում ենք պոմպերի միջոցով, ինչը լրացուցիչ ծախս է պահանջում: Խմելու ջրի ներհամայնքային ցանցը կառուցվել է 1970-ական թվականներին և ունի վերանորոգման անհրաժեշտություն: Բարեբախտաբար, խմելու ջրի կենսաբանական աղտոտման դեպքեր չեն արձանագրվել, սակայն ռիսկ կա, որ ներհամայնքային ցանցի մաշվածության պատճառով խմելու ջրին կարող են խառնվել կոյուղաջրերը:

2017-2021թթ-ի համայնքի զարգացման ծրագրով նախատեսել ենք ոռոգման ջրի ներքին ցանցի նորոգման և 1800 մետր խմելու ջրի ջրագծի խողովակի վերակառուցման միջոցառումներ համապատասխանաբար 12 մլն.դրամ և 30,0 մլն. դրամ գումարի նախագծային արժեքով։ Համայնքի սուղ, սահմանափակ միջոցներով անհնար է իրականացնել այդ ծրագրերը։

Դիմում ենք ՀՀ կառավարության և պետության աջակցությանը համայնքի զարգացման ծրագրով նախատեսված միջոցառումներին օժանդակելու հարցում՝ պետական պահուստային ֆոնդից և օրենքով չարգելվող այլ աղբյուրներից հատկացումների, ինչպես նաև միջազգային դոնոր կազմակերպությունների կողմից ֆինանսավորվող ծրագրերում համայնքի ներգրավման տեսքով։

Խնդրում ենք օգտագործել ձեր լծակները և նպաստել Արմավիրի կենսաբանական մաքրման կայանի աշխատանքները հնարավորինս շուտ սկսելուն»։

Ախուրյան-Արաքս ջրատար

Սույն նյութը պատրաստվել է «Պաշտպանիր ջրի նկատմամբ քո իրավունքը» ծրագրի շրջանակներում Ամերիկայի ժողովրդի աջակցությամբ` ԱՄՆ-ի Միջազգային զարգացման գործակալության միջոցով, որի ընթացքում արտահայտված տեսակետները կամ ներկայացված նյութերի բովանդակությունը միմիայն հեղինակներինն է և պարտադիր չէ, որ արտահայտեն ԱՄՆ ՄԶԳ կամ ԱՄՆ կառավարության տեսակետները:

17:46 Հուլիս 29, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news