«ԷկոԼուր» տեղեկատվական ՀԿ-ն հարցում է ուղարկել ՀՀ շրջակա միջավայրի նախարար Ռոմանոս Պետրոյանին Արարատյան դաշտի ստորգետնյա ջրային ռեսուրսների գերշահագործման վերաբերյալ:
Հարցման մեջ նշված է.
«Սույն թվականի հուլիսի 22-ին ՀՀ կառավարությունն ընդունեց «Հայաստանի Հանրապետության ցամաքուրդային (դրենաժային) համակարգերից օգտվելու կարգը, վճարները և պայմանագրի օրինակելի ձևը հաստատելու մասին» 1201 Ա որոշումը, որը մշակել են Ջրային կոմիտեն, ՀՀ արդարադատության, ֆինանսների, էկոնոմիկայի և շրջակա միջավայրի նախարարությունները:
Որոշման հիմնավորման մեջ, մասնավորապես, նշված է. «Հանրապետության ցամաքուրդային (դրենաժային) համակարգերի ընդհանուր երկարությունը կազմում է շուրջ 1695 կմ, որից Արարատյան դաշտում՝ 1532 կմ (շուրջ 90%): Վերջինիս նախագծային թողունակությունը կազմում է 36,3 մ3/վրկ կամ 1145,0 մլն մ3/տարի՝ ապահովելով ջրի հեռացումը դեպի Մեծամոր, Հրազդան և վերջին հաշվով՝ Արաքս գետ: Ներկայումս տարեկան միջին հեռացվող ջրերի ծավալը կազմում է շուրջ 50 մ3/վրկ կամ շուրջ 1,6 մլրդ մ3/տարի»:
«Ջրի ազգային ծրագրի մասին» ՀՀ օրենքի 6-րդ հոդվածի համաձայն՝ Արարատյան դաշտի վերականգնվող ստորերկրյա ջրային ռեսուրսները կազմում են 1.1 մլրդ մ3/տարի:
Այսպիսով, ՀՀ կառավարության 2021թ-ի հուլիսի 22-ի 1201 Ա որոշմամբ հիմնավորվում է, որ տեղի է ունենում Արարատյան դաշտի ստորգետնյա ջրերի գերշահագործում 2021թ-ի դրությամբ ևս, ինչն անդառնալի հետևանքներ ունի Արարատյան դաշտի համար:
Արարատյան դաշտից ստորգետնյա ջրային պաշարներից տարեկան 1,6 միլիարդ խմ ջրառի մասին պաշտոնական և փորձագիտական շրջանակները նշում են տարիներ շարունակ: Այս թիվը 2021թ-ին մնացել է անփոփոխ՝ չնայած ՀՀ բնապահպանության նախարարության կողմից իրականացվել են՝ Արարատյան դաշտի խորքային հորերի փականային ռեժիմի բերման, լուծարման և կոնսերվացման միջոցառումներ:
«Տեղեկատվության ազատության մասին» ՀՀ օրենքի 6-րդ հոդվածի համաձայն՝ խնդրում ենք տեղեկացնել.
- Վերջին 5 տարիների ընթացքում ՀՀ շրջակա միջավայրի նախարարությունն Արարատյան դաշտի ստորգետնյա ջրային ռեսուրսների գերշահագործման կանխարգելման և ջրառի նվազեցմանն ուղղված ի՞նչ միջոցառումներ է իրականացրել, և որքա՞ն ջուր է խնայվել դրա արդյունքում:
- 2021թ-ի դեկտեմբերի դրությամբ որքա՞ն է կազմում Արարատյան դաշտի ստորգետնյա ջրային ավազանից իրականացված ջրառն ըստ ձկնաբուծության, ոռոգման և հայկական ատոմային էլեկտրակայանի շահագործման նպատակով տրված ջրօգտագործման թույլտվությունների:
- Արդյո՞ք նախարարությունն ունի գործողությունների ճանապարհային քարտեզ, թե իրականացվելիք միջոցառումների արդյունքում ինչ ժամկետներում Արարատյան դաշտի ստորգետնյա ջրային ավազանից ջրառի չափաքանակը կհասցվի «Ջրի ազգային ծրագրի մասին» օրենքով սահմանված 1,1 միլիարդ խմ-ի շեմին:
- ՀՀ շրջակա միջավայրի նախարարության ջրային ռեսուրսների կառավարման վարչությունն իր լիազորությունների սահմաններում 2020-2021թթ. ի՞նչ գործողություններ է կատարել ապօրինի ջրօգտագործման դեպքերի, ինչպես նաև ՋԹ-ով նախատեսված ջրառից հավելյալ ջրառ իրականացման կանխարգելման համար:
- Արդյո՞ք Շրջակա միջավայրի նախարարությունն ունի ուսումնասիրություն, թե կլիմայի փոփոխությունն ինչպես է ազդել Արարատյան արտեզյան ավազանի վրա, մասնավորապես, կլիմայի փոփոխության և ստորերկրյա ջրերի մակարդակի իջեցման և դրանց փոխկապակցության ենթատեքստում։ Եթե այո, խնդրում ենք տալ այդ ուսումնասիրության վերջնարդյունքը»։
Դեկտեմբեր 07, 2021 at 15:55