ԷկոԼուր
Ներկա դրությամբ Զանգեզուրի պղնձամոլիբդենային կոմբինատի (ԶՊՄԿ) պոչատարի վթարի, որը տեղի էր ունեցել օգոստոսի 20-ին Կապանից ոչ հեռու, հետքերը մաքրվել են: Կապանից ստացված ոչ պաշտոնական տեղեկատվության համաձայն`հատուկ բրիգադները հավաքել են եւ լվացել են պոչերը, որոնք վթարված պոչատարից լցվել էին հողի վրա: Վնասի չափի մասին դեռ տեղեկատվություն չկա: Մեր տվյալներով` օգոստոսի 21-ին ԶՊՄԿ-ն պետք է հանդես գա հայտարարությամբ: Իսկ բնապահպանական տեսչությունը պետք է վնասի վերաբերյալ ակտ կազմի եւ գնահատի վնասի չափը: Մեր գործընկեր` «Սյունյաց երկիր» թերթի գլխավոր խմբագիր Սամվել Ալեքսանյանը «ԷկոԼուր»-ի հետ հեռախոսազրույցում անհանգստություն հայտնեց պոչատարի կրկնվող վթարների կապակցությամբ: «Մենք տեսանք, թե ինչպես ամբողջ օրվա ընթացքում Ողջի գետում կոմբինատի պոչերն էին: Սա առաջին անգամը չէ, նման դեպքերը քիչ չեն: Ցավոք, ոչ ոք կոմբինատին պատասխանատվության չի կանչում պոչերի արտանետումներից առաջացած հետեւանքների համար: Եթե նույնիսկ տեսչությունը տուգանում է կոմբինատին, ապա դրանք աննշան տուգանքներ են, դրանք ձեւական բնույթ են կրում: 35կմ երկարությամբ պոչատար խողովակը մշտական հսկողության եւ վերակառուցման կարիք ունի: Ղեկավարությունը պետք է միջոցներ ձեռնարկի, որպեսզի նվազեցնի վթարների ռիսկերը, ինչը մենք դեռ չենք տեսնում»,- ասաց Սամվել Ալեքսանյանը: Կապանի Օրհուս կենտրոնի համակարգող Աշոտ Ավագյանը «ԷկոԼուր»-ին հայտնեց, որ Կապանի հասարակայնությունը մտադիր է այդ հարցը քննարկել ԶՊՄԿ-ի եւ տարածքային բնապահպանական տեսչության ներկայացուցիչների հետ:
Օգոստոս 21, 2012 at 15:24