«ԷկոԼուր»
Բնապահպանության նախարարությունը հերթական անգամ հրաժարվեց իր առաջնահերթություններից եւ կանաչ լույս վառեց նոր օբյեկտի՝ Հրազդանի հարստացուցիչ ֆաբրիկայի համար:
Հրազդանն մտնում է երկրի էկոլոգիապես անբարենպաստ քաղաքների ցուցակի մեջ առաջին հերթին փոշու պատճառով: Փոշու կոնցենտրացիան, կախված քամու ուղղությունից եւ ցեմենտի գործարանի գործունեության տեմպից, թույլատրելի նորման գերազանցում է 5 անգամ: Դրա հետ մեկտեղ պետք է նշել, որ Հրազդանը գտնվում է երկրի ամենահեղինակավոր առողջարաններից մեկի՝ Ծաղկաձորի կողքին, որը հավակնում է միջազգային նշանակության առողջավայրի կարգավիճակի: Այս տեղավայրը հայտնի է իր բարենպաստ կլիմայական պայմաններով, հանքային աղբյուրներով, պատմամշակութային հուշարձաններով:
Քաղաքի էկոլոգիային եւ նրա շրջակայքին ի՞նչ կավելացնի նոր ֆաբրիկան՝ հաշվի առնելով այն հանգամանքը, որ այն պետք է տեղակայվի Հրազդանից ընդամենը 1,5 կմ հեռավորության վրա:
Հարց առաջին: Եթե, որոշ փորձագետների գնահատականների համաձայն, պայթեցման աշխատանքների արդյունքում փոշու ամպը ծածկում է 5կմ շառվղով տարածք, ապա փորձագիտության ներկայացված նախագծում ինչպե՞ս է գրվել, որ Հրազդանի մթնոլորտի վրա ձեռնարկության ազդեցությունը թույլատրելի նորման չի գերազանցի:
Հարց երկրորդ: Հայտնի է, որ Հրազդանի հանքավայրի նման հանքավայրի շահագործման դեպքում ռադոնի հաշվին կավելանա ռադիոակտիվ ֆոնը: Այս մասին նախագծում ընդհանրապես խոսք չկա:
Հարց երրորդ: Նախագծում նշված են ֆաբրիկային ամենից մոտ գտնվող գյուղերը, բայց դրա հետ մեկտեղ ոչինչ չի ասվում Հրազդան քաղաքի Աթարբեկյան համայնքի մասին, որը գտնվում է հենց հանքավայրի մոտ: Մեզ հետ զրույցում Աթարբեկյանի բնակիչները խոստովանեցին, որ ոչինչ չգիտեն այդ նախագծի մասին, բայց կցանկանային իմանալ, թե ով եւ ինչ է կառուցում, որտեղ է պայթեցում կատարելու, եւ եթե նրանց տնտեսությունները տուժեն, ապա ով է իրենց հատուցելու:
Ցավոք սրտի, չհաջողվեց «Նագին» ընկերությանը տալ այդ եւ ուրիշ հարցերը:
«ԷկոԼուր»-ի հետ նամակագրության ընթացքում Հրազդանի Օրհուս կենտրոնի համակարգող Էդգար Ենգիբարյանը նշեց, որ, չնայած նախօրոք ձեռք բերված պայմանավորվածությանը, Հրազդանի Օրհուս կենտրոնը չի հրավիրվել նախագծի լսմանը: Չէին հրավիրվել նաեւ այլ շահագրգիռ կողմեր, մասնավորապես՝ Կոտայքի մարզի բնապահպանության վարչությունը, գյուղական համայնքների ներկայացուցիչները, տեղի ՀԿ-ները:
ՀՀ բնապահպանության նախարարությունը նախագծի վերաբերյալ հասարակական լսումների մասին հայտարարությունն իր պաշտոնական կայքում տեղադրել է հասարակական լսումներից մի քանի օր անց:
Մարտ 13, 2009