ՀՀ Արագածոտնի մարզի Ապարան համայնքի Երնջատափ և Շողակն բնակավայրում այսօր անցկացվել են հանրային լսումներ, որոնք նախաձեռնել է «Նորթ Ինվեստ» ՍՊԸ-ն՝ ցեմենտի արտադրամաս հիմնելու համար ազդակիր համայնքներից համաձայնություն ստանալու նպատակով։
Տեղի բնակիչները մերժեցին ընկերությանը՝ նշելով, որ Ապարան համայնքում զարգանում է զբոսաշրջությունը, այդ թվում՝ էկոզբոսաշրջությունը, նախատեսվում է խոշոր ենթակառուցվածքի կառուցում, համայնքի բնակավայրերը մտադիր են վերածվել հանգստի գոտիների, իսկ դրա համար անհրաժեշտ է պահել մաքուր բնությունը։
Նախատեսվող արտադրամասի տարածքը, ըստ բնակիչների, անմիջապես արոտավայրերի ու ցանքսերի կողքին է։
Երնջատափի բնակիչները ստորագրահավաք էին անցկացրել մինչ լսումները, որին միացել է 169 «դեմ» բնակիչ։
Երնջատափի վարչական ղեկավար Հրաչյա Սահրադյանը նշեց, որ ինքն էլ իր հերթին կողմ է բնակիչների պահանջին։
Ստորագրահավաքը հանձնվեց Ապարանի համայնքապետի տեղակալ Հրայր Մկրտչյանին։
Նշենք, որ ըստ ՀՀ Արդարադատության նախարարության իրավաբանական անձանց պետական ռեգիստրի՝ «Նորթ Ինվեստ» ՍՊԸ-ն ստեղծվել է 2016 թվականին։ 2023 թվականի՝ իրական շահառուների վերաբերյալ հայտարարագրում ընկերության անվանումն այլ է՝ «ԱՐԵԳ ՊԼՅՈՒՍ»։ 2025 թվականի հայտարարագրում նշված է «Նորթ Ինվեստ»։ Ընկերության 100 տոկոս բաժնետոմսերի սեփականատերը ՀՀ քաղաքացի Վահան Աստեյանն է։
Երնջատափի հանրային լսումները՝ Էկոլուրի տեսանյութում
Սեպտեմբեր 25, 2025 at 15:59