Հրազդանում կառուցապատման համար ծառեր են հատել (Լուսանկարներ)

ԷկոԼուր

Հրազդանցիների մի մասը քաղաքի ծառերը հատում են, որ շինություններ կառուցեն, մյուսներն էլ երազում են քաղաքը եղեւնիների քաղաք դարձնելու մասին:

«Ցանկացած քաղաք պետք է ունենա իր խորհրդանիշը, իր այցեքարտը: Ես միշտ մտածում եմ ու նույնիսկ երազում եմ, որ Հրազդանը կարելի էր դարձնել եղեւնիների քաղաք: Եւ այցելուները Հրազդանից տպավորություն կստանային, որ այն եղեւնիների քաղաք է: Այստեղ երկարատեւ եւ ցրտաշունչ ձմեռներ են լինում, եւ մեր կլիմայի, մեր բնության պայմաններում եղեւնին բավական լավ է աճում: Սակայն այսօր ինչ է կատարվում եղեւնիների պուրակում (գտնվում է Հրազդանի վերեւի հատվածում` շուկայի մոտ), դա ուղղակի մեկ բառով կարելի է ասել բնության սպանդ, բնության գենոցիդ»,- «ԷկոԼուր»-ի հետ զրույցում ասաց Հրազդանի բնակիչ, ՀԱԿ-ի Հրազդանի կառույցի ղեկավար Մեսրոպ Մեսրոպյանը: Հրազդան կատարած «ԷկոԼուր»-ի այցի ընթացքում քաղաք տանող ճանապարհին տեսանք մեծ թվով  թարմ կոճղեր: Տեղաբնակների խոսքերով` կանաչ գոտին հանձնվել է կառուցապատման:  

Հրազդան քաղաքի օդային ավազանը համարվում է Հայաստանի ամենաղտոտված ավազաններից մեկը. այստեղ են գործում Հրազդանի ցեմենտի գործարանը, ջերմաէլեկտրակայանը: Այս ձեռնարկությունների արտանետումներից պաշտպանվելու համար քաղաքին անհրաժեշտ են կանաչ գոտիներ:  

Մայիս 16, 2012 at 18:53