ԷկոԼուր
Հայտնի են 2013թ. Հայաստանի կանաչապատ եւ մաքուր համայնքների անունները, Երեւանը նրանց մեջ չէ: Նոյեմբերի 10-ին` «Տարվա լավագույն համայնք-2013» մրցանակաբաշխության ժամանակ, «Կանաչապատ համայնք» է ճանաչվել Ստեփանավան քաղաքային համայնքը, իսկ Իջեւան քաղաքին այս անվանակարգում տրվել է հատուկ մրցանակ: Այս մասին տեղեկացնում է ՀՀ տարածքային կառավարման նախարարության հասարակայնության հետ կապերի բաժինը:
Աղբյուրի համաձայն` 2013 թվականի լավագույն քաղաքային համայնք է ճանաչվել Արմավիրի մարզի Էջմիածին քաղաքը, լավագույն գյուղական համայնք՝ Վայոց ձորի Ռինդ համայնքը։ «Լավագույն համայնք» մրցանակաբաշխության շրջանակում հատուկ մրցանակների են արժանացել Ապարան, Քաջարան, Մերձավան, Պեմզաշեն համայնքները:
«Մաքուր համայնք» անվանակարգում մրցանակներ են շնորհվել Վայոց ձորի մարզի Ջերմուկ քաղաքային եւ Արմավիրի մարզի Լեռնագոգ գյուղական համայնքներին:
Մշակութային լավագույն քաղաքային համայնք է ճանաչվել Սյունիքի մարզի Գորիս քաղաքը, գյուղական համայնք` Արմավիրի մարզի Փարաքար համայնքը: Հաշվի առնելով «Համագործակցության մշակութային մայրաքաղաքներ» միջպետական ծրագրի շրջանակում «ԱՊՀ մշակութային մայրաքաղաք ճանաչված» Գյումրիում տարվա ընթացքում անցկացված միջոցառումները` Գյումրիին շնորհվել է հատուկ մրցանակ:
Հայաստանի մայրաքաղաք Երեւանին մրցանակ չի շնորհվել: Հիշեցնենք, որ 2012թ. Երևանը հաղթող էր ճանաչվել «Տարվա լավագույն համայնք» ամենամյա մրցանակաբաշխության «Լավագույն կանաչապատ համայնք 2012» անվանակարգում:
«Հայաստանի Հանրապետության տոների եւ հիշատակի օրերի մասին» ՀՀ օրենքի համաձայն` նոյեմբերի 10-ը պաշտոնապես նշվում է որպես Տեղական ինքնակառավարման օր: Հայաստանում տեղական ինքնակառավարման համակարգն արդեն 17 տարեկան է:
Նոյեմբեր 13, 2013 at 13:05