www.1lurer.am, Վրույր Մկրտչյան
2022 թվականի փետրվարի 1-ից էներգետիկ շուկան կազատականացվի: Հանրային ծառայությունները կարգավորող հանձնաժողովի նախագահի խոսքով՝ խնդիրներից խուսափելու նպատակով գործընթացը դանդաղ քայլերով է իրականացվում:
Գարեգին Բաղրամյան, ՀՀ ՀԾԿՀ նախագահ - Նոր մոդելում որոշ կայաններ երկդրույք սակագներով չեն վաճառելու հոսանքը, այլ միադրույք սակագնով:
Նոր փոփոխություններով՝ սպառողը կկարողանա ընտրել, թե որ արտադրողից գնի էլեկտրաէներգիա: Արդյունքում՝ Հայաստանի էլեկտրական ցանցերից բացի, կգործեն նաև Էլեկտրաէներգիա մատակարարող նոր ընկերություններ:
Գարեգին Բաղրամյան - ՀԵՑ-ը բնական մենաշնորհ ունի և բացառիկ իրավունքներ, այս դեպքում վաճառքը բացառիկ չէ, և մատակարար ընկերությունները կարող են ունենալ սպառողների խմբեր, որոնց վաճառվող հոսանքի գները հանձնաժողովը չի որոշելու:
Արդեն 5 ընկերություն հայտ է ներկայացրել՝ ստանալու մատակարար ընկերության լիցենզիա: Փոփոխությունը գնի վրա չի ազդի՝ ասում է ՀԾԿՀ նախագահը: Բաղրամյանը, սակայն, չի բացառում, որ մի շարք այլ գործոններով պայմանավորված՝ հոսանքի սակագնի բարձրացում, այդուամենայնիվ, կլինի:
Երևանում նոր ջերմային էլեկտրակայանի կառուցումը ենթադրում է, որ շուկայում կստեղծվի որոշակի մրցակցություն և հնարավոր կլինի ապահովել ավելի ցածր գին, սակայն առայժմ պարզ չէ՝ արդյոք այդ կայանի շահագործումն ու այլ էներգետիկ հզորությունների աճն ազդեցություն կունենան ընդհանուր սակագնի ձևավորման վրա:
Թե որքանով կբարձրանա էնեկտրաէներգիայի սակագինը, Բաղրամյանն այս պահին դժվարանում է ասել: Պարզ կլինի մոտ երկու շաբաթից:
Դեկտեմբեր 13, 2021 at 10:26