Հունվարի 22-ին Երևանում ԵՄ կողմից ֆինանսավորվող «Քաղաքապետերի դաշնագիր՝ Արևելք» (CoM East) ծրագրի շրջանակում՝ Հայաստանի համայնքների միության աջակցությամբ, անցկացվել է Քաղաքապետերի դաշնագրի ակումբի չորրորդ հանդիպումը։
Հանդիպմանը մասնակցել են ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը Հայաստանում ԵՄ պատվիրակության ղեկավար, դեսպան Վասիլիս Մարագոսը, Ծրագրի աշխատանքային խմբի ղեկավար Քրիստոֆ Ֆրերինգը, ՀՀ-ում ԵՄ «Քաղաքապետերի դաշնագիր հանուն կլիմայի և էներգիայի» առաջատար նախաձեռնությանն անդամակցող համայնքների, ինչպես նաև գործընկեր կազմակերպությունների ներկայացուցիչներ, փորձագետներ:
Քաղաքապետերի դաշնագրի ակումբի հանդիպման ընթացքում ակումբի նախագահ է ընտրվել Գյումրիի քաղաքապետի ժամանակավոր պաշտոնակատար Սարիկ Մինասյանը և ակումբի փոխնախագահ է ընտրվել Ստեփանավան համայնքի ղեկավար Արմեն Գրիգորյանը։
Որպես Ակումբի նախագահ և փոխնախագահ, Գյումրիի քաղաքապետի ժամանակավոր պաշտոնակատարը, ինչպես նաև Ստեփանավան համայնքի ղեկավարը կանդամակցեն նաև «Քաղաքապետերի դաշնագիր՝ Արևելք» ծրագրի Խորհրդին՝ մասնակցելով Խորհրդի հանդիպումներին և նախաձեռնության հետ կապված այլ միջոցառումների:
Հայաստանում ԵՄ պատվիրակության ղեկավար, դեսպան Վասիլիս Մարագոսը, ողջունելով Քաղաքապետերի դաշնագրի ակումբի չորրորդ նիստի մասնակիցներին, համայնքի ղեկավարներին, գործընկերներին, նշել է․ «Մենք շարունակում ենք մեր համագործակցությունը ՀՀ-ի հետ աջակցելու հայկական ինստիտուտներին, համայնքապետարաններին, կառավարությանը, մասնավոր հատվածին»։ Դեսպանը կարևորել է նաև համայնքապետարանների կողմից բնակիչներին մատուցվող ծառայությունների մակարդակի բարձրացումը։ Նաև բարձր է գնահատել համայնքների կողմից Կայուն էներգետիկ զարգացման գործողությունների ծրագրերի մշակումը․ «Այդ գործողությունների ծրագիրը բոլորի համար է և պետք է իրականացվի ՏԻՄ մակարդակում, ՏԻՄ-երի շահակիցների հետ միասին»։
ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը, կարևորելով համայնքների դերը կայուն զարգացման տեղական ռազմավարությունների մշակման և իրականացման գործում, նշել է․ «Համատեղ ջանքերով մենք կարող ենք հասնել դրական փոփոխությունների և ապահովել համայնքների կայուն զարգացումը։ Այսօրվա նիստը հնարավորություն է տալիս ներկայացնել մեր և մեր գործընկերների ձեռքբերումները, հետագա քայլերը, ինչպես նաև քննարկել առկա մարտահրավերները։ Հորդորում եմ տեղական ինքնակառավարման մարմինների ներկայացուցիչներին ակտիվորեն մասնակցել քննարկումներին և ջանքեր գործադրել նման նախաձեռնություններին առավել արդյունավետ մասնակցելու համար»։
Ծրագրի աշխատանքային խմբի ղեկավար Քրիստոֆ Ֆրերինգը հավաստիացրել է՝ Դաշնագրի ակումբը լավ հարթակ է ազգային մակարդակով ազատ կերպով համայնքապետարանների միջև քննարկում ծավալելու համար, ինչը շատ կարևոր է․ «Քաղաքներն իսկապես ուզում են էներգախնայող լինել, դիմակայել կլիմայական փոփոխություններին, դրա համար ազգային մակարդակում պետք է ունենալ համապատասխան օրենսդրություն, կանոնակարգեր։ Մենք պատրաստ ենք աջակցել համայնքներին»։
Համայնքների միության խորհրդական Նատալյա Լափաուրին կարևորել է ԵՄ-ի հետ համագործակցությունը Քաղաքապետերի դաշնագրի շրջանակներում՝ հատկապես համայնքների զարգացման հարցում։ Նա փաստել է՝ այն համայնքները, որոնք արդեն անդամակցում են Դաշնագրին, որակապես տարբերվում են, ուստի սա ևս վկայում է, որ համագործակցության ձևաչափն արդյունավետ է։
Քաղաքապետերի դաշնագրի ակումբը ձևավորվել է Հայաստանում 2019 թվականի մարտին՝ «CoM East»-ի ծրագրի աջակցությամբ: Ակումբի հիմնական առաքելությունն է ամրապնդել քաղաքական երկխոսությունը տեղական իշխանությունների և համապատասխան ազգային ու միջազգային շահառուների միջև՝ նպատակ ունենալով ստեղծել բարենպաստ միջավայր համայնքների կայուն զարգացման և տեղական ռազմավարությունների հաջող իրականացման համար, որոնք ուղղված են ջերմոցային գազերի արտանետումների կրճատմանը, կլիմայի փոփոխության բացասական ազդեցությունների հանդեպ դիմակայունության ամրապնդմանը և էներգետիկ աղքատության հաղթահարմանը:
Ակումբը նպաստում է բոլոր ներգրավված շահառուների միջև տեղեկատվության ու փորձի փոխանակմանը, ապահովում փոխգործակցություն համապատասխան նախաձեռնությունների, համայնքային, պետական և միջազգային ծրագրերի և գործողությունների միջև, ինչպես նաև ծառայում որպես հարթակ՝ երկրում Դաշնագրի շրջանակներում իրականացվող գործողությունների և զարգացումների քննարկման համար:
Քաղաքապետերի դաշնագրի ակումբի Չորրորդ հանդիպման ընթացքում ներկայացվել են «Քաղաքապետերի դաշնագիր՝ Արևելք» ծրագրի ձեռքբերումներն ու առաջիկա անելիքները ԱլԳ տարածաշրջանում և Հայաստանում, ներկայացվել են համայնքների կայուն էներգետիկ և կլիմայական զարգացմանն ուղղված ազգային և միջազգային ջանքերի արդյունքները:
Ակումբի նիստի երկրորդ հատվածում գործընկեր կազմակերպությունները ներկայացրել են ՀՀ-ում իրականացվող տարբեր ծրագրեր, որոնք աջակցություն են տրամադրում համայնքներին շենքերի էներգաարդյունավետ արդիականացման, էներգախնայողությանև կայուն զարգացմանն առնչվող այլ ոլորտներում։
Լուսանկարը՝ Հայաստանի համայնքների միություն
Հունվար 24, 2025 at 14:33