ՀԱՅԱՍՏԱՆՈՒՄ ՇՈՒՏՈՎ ԱՆՏԱՌԱՊԱՀ ՉԻ ՄՆԱ. ՆՐԱՆՔ ՀԱԶԻՎ ԵՆ ԾԵՐԸ ԾԵՐԻՆ ՀԱՍՑՆՈՒՄ

ՀԱՅԱՍՏԱՆՈՒՄ ՇՈՒՏՈՎ ԱՆՏԱՌԱՊԱՀ ՉԻ ՄՆԱ. ՆՐԱՆՔ ՀԱԶԻՎ ԵՆ ԾԵՐԸ ԾԵՐԻՆ ՀԱՍՑՆՈՒՄ

News.am

Սյունիքի մարզի Գորիս քաղաքի անտառապահ Արթուր Յուզբաշյանը, ում վերահսկողության տակ է գտնվում Գորիսի անտառների ընդհանուր տարածքի 300 հա հատվածը, դժգոհ է իր աշխատավարձից։
«Ամեն օր 25-30 կմ ոտքով շրջում եմ անտառում։ Առավոտյան 7-ին դուրս եմ գալիս եւ երբեմն տուն եմ վերադառնում գիշերը 12-ին։ Շաբաթը 7 օր աշխատում եմ։ Նոր տարվա նախօրեին էլ հերթապահությունը դառնում է շուրջօրյա։ Ու ամսական դրա համար ստանում եմ ընդամենը 50 հազար դրամ»-պատմում է  անտառապահն ու հավելում, որ դա չի բավականացնում նույնիսկ հանապազօրյա հացի համար:

«Գործն իմ սրտով է, նվիրված եմ իմ աշխատանքին, սակայն եթե ես իմ երեխայի հանապազօրյա հացը չեմ կարողանում վաստակել, էլ ինչի՞ համար շարունակեմ աշխատել։ Տանը 7 շունչ ենք, միայն ես եմ աշխատում, վճարովի  սովորող երկու  ուսանող ենք պահում»- վրդովված նշում է անտառապահը։
«ՀայԱնտառ» ՊՈԱԿ-ի  տնօրենի տեղակալ Սամվել Սահակյանի խոսքով, անտառապահերի աշխատավարձերի բարձրացում նախատեսվում է, բայց «այսօր այդ ֆինանսական միջոցները չկան»: Նրա խոսքով, աշխատավարձերը բարձրացնելու այլ տարբերակ էլ կա, որը պայմանավորված է «ՀայԱնտառի»  ֆինանսական հնարավորությունների ավելացմամբ: «Կախված նրանից, թե համակարգը որքան լավ կաշխատի եւ որքան լրացուցիչ եկամուտներ կստանա, այդքանով էլ կարող է բարձրացնել աշխատավարձները»,-նշեց Սահակյանն ու շարունակեց. «Անտառների պահպանության հիմնական ծախսերը հոգում է պետական բյուջեն, որը դրա համար նախատեսում է 710 միլիոն դրամ։ Այդ գումարը բավական չէ նույնիսկ զուտ միայն աշխատողներին աշխատավարձ տալու համար։ Մնացած ծախսերը աշխատում ենք համակարգել սեփական եկամուտների հաշվին, որն առաջանում է հիմնականում փայտանյութի վաճառքի միջոցով»։ Վերջինս համոզված է, որ 45-55  հազար դրամով հնարավոր չէ գոյատեւել, «սակայն այդ աշխատավարձը գյուղական վայրերում լրացուցիչ եկամտի աղբյուր է, քանի որ բացի աշխատավարձից, թույլ է տրվում անտառից խոտ եւ հատապտուղներ հավաքել»:

Բացի այն, որ անտառապահները չնչին աշխատավարձ են ստանում, նրանց չեն տրամադրում նաեւ անհրաժեշտ միջոցներ. զենք` գազաններից պաշտպանվելու համար, ձի, արտահագուստ, փոխադրամիջոց եւ այլն:

«Առաջներում կոմունիստների ժամանակ անտառապահներին տրամադրում էին զենք, ձի, ձիու  համար գարի, արտահագուստ։ Բայց այսօր ինձ մոտ միայն երեք տարի առաջ տրված արտահագուստ կա»-նշում է անտառապահ Արթուր Յուզբաշյանը։

«ՀայԱնտառի» ներկայացուցիչը հավաստիացրեց, որ նախատեսվում է տրամադրել հագուստ, զենք, տեխնիկա, փոխադրամիջոց, սակայն, թե կոնկրետ երբ, դարձյալ չնշեց, քանի որ դա նորից կախված է նյութական հնարավորություններից։

Այդ ամենից զատ, անտառապահներն անպաշտպան են նաեւ  օրենսդրորեն։ Թեեւ օրենքով  նախատեսված է 8 ժամյա աշխատանքային օր եւ շաբաթը 5 օր աշխատանքային գրաֆիկ, սակայն, եթե հանգստյան օրերին կամ ոչ աշխատանքային ժամերին վերահսկվող  հատվածում ապօրինություն է  կատարվում,  ապա  ամբողջ պատասխանատվությունը ջարդվում է հենց  անտառապահների ուսերին։

«Ինձ հետ այդպիսի մի  դեպք եղել է։ Իմ վերահսկողության տակ գտնվող տարածքում  6-7 սմ բուն ունեցող 3 հատ չոր ծառ էին հատել։ 65 700 դրամ տուգանք գրվեց, որ չէի կարողացել հայտնաբերել, թե ո՞վ է եղել կտրողը։ Այդ ամիս առանց աշխատավարձի մնացի», -պատմեց Արթուր Յուզբաշյանը։

«Հայանտառի» փոխտնօրենի խոսքով, անտառային օրենսդրությունը չի խրախուսում անտառապահին՝  բացահայտելու անտառում կատարված ապօրինությունը, քանի որ «երբ նա բացահայտում է որեւէ անտառահատման փաստ, դրա համար հենց իրեն են տուգանում, էլ ինչո՞ւ պետք է բացահայտի»:

Թերեւս սա է պատճառը, որ անտառապահները ստիպված են լինում երբեմն անօրինական գործարքի մեջ մտնել։ Ի դեպ գազի գների թանկացման հետ կապված անտառապահների աշխատանքն ավելի է բարդացել, քանի որ գյուղացիները հույսները  դնում են անտառից բերված վառելափայտի վրա:

Ինչպես NEWS.am-ի թղթակցի հետ զրույցում իրավացիորեն նշեց Սյունիքի մարզի ‹‹Խուստուփ›› բնապահպանական ՀԿ-ի նախագահ  Վլադիկ Մարտիրոսյան. «Գալու է  ժամանակ, երբ ճրագով ման գանք անտառապահ չենք գտնելու»։

Հոկտեմբեր 08, 2010


Առնչվող նյութեր


Կատեգորիա

ավելին
պակաս

Մարզեր