ԷկոԼուր
2016 թվականին Անտառի համաշխարհային օրը՝ մարտի 21-ը, նշվում է «Անտառը և ջուրը» կարգախոսով: Անտառները զբաղեցնում են Երկիր մոլորակի ցամաքի մեկ երրորդը: Անտառներից է կախված 1.6 միլիարդ մարդու բարեկեցությունը: Գլոբալ անտառհատումների արդյունքում անտառային տարածքները նվազում են սպառնացող տեմպերով. տարեկան հատվում է մոտ 13 միլիոն հեկտար անտառ: Այդ 13 միլիոն հեկտար անտառը կարող էր կլանել ջերմոցային գազերի համաշխարհային արտանետումների 12-20 տոկոսը, որոնք կլիմայի փոփոխության հիմնական պատճառն են:
Կլիմայի փոփոխության պայմաններում անտառների դերը ջրային ռեսուրսների հետ միասին մեծանում է: Անտառը պահպանում է ջրային ռեսուրսները: Այսպիսով, անտառային ջրհավաք ավազանները և խոնավ անտառային հանդակները տալիս են Երկրի վրա առկա քաղցրահամ ջրի 75 տոկոսը: Անտառները նաև ջրի բնական զտիչներն են:
Ըստ պաշտոնական տվյալների, անտառապատ է Հայաստանի 11 տոկոսը: Այս թիվը չի փոխվում 1993 թվականից: Իսկ ոչ պաշտոնական տվյալների համաձայն, այսինքն այն տվյալների, որոնք չի ընդունում «Հայանտառ» ՊՈԱԿ-ը, կա մեծ տարբերություն՝ 6-9 տոկոս: Տարբերությունը բացատրվում է նրանով, որ անտառների ապօրինի հատումներն այնքան մեծածավալ են, որ դուրս են եկել վերահսկողությունից: Անտառների հաշվառում և գույքագրում չի իրականացվում: 2010 թվականի սոցիալական հարցումների համաձայն, Հայաստանում փայտանյութի տարեկան սպառումը կազմում է 709.861 խմ: Այս թիվն ավելի քան 20 անգամ գերազանցում է անտառհատումների պաշտոնական թույլատրելի քանակությունը՝ տարեկան 30.000 – 35.000 խմ: Այժմ էլ իրավիճակը չափազանց անբարենպաստ է: Անտառային հասարակական մոնիտորինգի արդյունքների համաձայն, որը մի խումբ ակտիվիստներ իրականացնում են անտառային տնտեսություններում ENPI FLEG II ծրագրի շրջանականերում, յուրաքանչյուր ստուգում ցույց է տալիս, որ առանձին վերցրած անտառային տնտեսություններում, առանձին տարածքներում, ապօրինի հատված են հարյուրավոր ծառեր: Անտառհատումների նման տեմպերը պահանջում են նոր անտառտնկումներ: Սակայն կառավարությունը 2016 թ. ոչ մի դրամ չի հատկացրել անտառտնկումների համար: Այս տարի բոլոր ծառատնկումներն իրականացվելու են միայն դոնոր կազմակերպությունների միջոցների հաշվին:
Շնորհավոր բոլորին Անտառի համաշխարհային օրվա կապակցությամբ:
Մարտ 21, 2016 at 12:23