ԷկոԼուր
«Անտառային օրենսգրքում փոփոխություններն ակնհայտ արված են նրա համար, որ կառուցապատումը թույլատրվի, որպեսզի որոշ մարդկանց արդեն կառուցված օբյեկտներն օրինականցավեն, և շարունակվի կառուցապատումն անտառապատ տարածքներում»,- ասաց Համահայկական բնապահպանական ճակատի համակարգող Լևոն Գալստյանը «ԷկոԼուր» մամուլի ակումբում տեղի ունեցած «Անտառի կայուն կառավարումը որպես կլիմայի քաղաքականության անբաժանելի մաս» խորագրով կլոր սեղանի ժամանակ:
Հիշեցնենք, որ ՀՀ կառավարությունը ՀՀ Ազգային ժողով է ուղարկել ՀՀ Անտառային օրենսգրքի փոփոխությունների մասին նոր օրինագիծ, որով թույլատրվում է անտառում կառուցապատում իրականացնել:
Լեւոն Գալստյանը նշեց, որ անտառում կառուցապատում թույլատրելու դեպքում անտառից ոչինչ չի մնա: «Իրավիճակն այն է, որ երբ անտառում մի փոքր բան է կառուցվել, ճանապարհ է բացվել եւ լրացուցիչ թույլտվություն է եղել ծանր տեխնիկայով ծառերը հանելու, ապա 2 տարի հետո ծառերի 50 տոկոսն այդտեղից վերացել է, սրան է բերում այդ կառուցապատումը»:
Լեւոն Գալստյանն առաջարկեց ՀՀ անտառային օրենսգրքից հանել արտադրական նշանակության անտառներ հասկացողությունը, քանի որ Հայաստանում արտադրական նշանակության անտառներ չկան, ինչպես նաեւ առաջարկեց օրենսդրությամբ սահմանել հատուկ նշանակության անտառների օգտագործման և պահպանման կարգը:
 |
 |
Նյութը պատրաստել է «ԷկոԼուր» տեղեկատվական ՀԿ-ն «Հայաստանի երկամյա առաջընթացի առաջին զեկույցը ՄԱԿ ԿՓՇԿ-ին» ՄԱԶԾ-ԳԷՖ/00079327» ծրագրի շրջանակներում:
Սույն հրապարակման մեջ արտահայտած տեսակետները հեղինակային են և պարտադիր չէ, որ համընկնեն ՄԱԿ-ի` ներառյալ ՄԱԶԾ-ի կամ ՄԱԿ-ի անդամ պետությունների պաշտոնական դիրքորոշման հետ:
Մայիս 02, 2016 at 15:55