ՖԱԼԵՏՏԱՆ ԱՆՀՆԱԶԱՆԴ ՀԱՆՔԱԳՈՐԾՆԵՐԻ ՀԱՆԴԵՊ ԷԼԵԿՏՐԱՇՈԿ ԿԻՐԱՌԵԼՈՒ ՊԱՏՐԱՍՏՈՒԹՅՈ՞ՒՆ ԷՐ ՏԵՍՆՈՒՄ

ՖԱԼԵՏՏԱՆ ԱՆՀՆԱԶԱՆԴ ՀԱՆՔԱԳՈՐԾՆԵՐԻ ՀԱՆԴԵՊ ԷԼԵԿՏՐԱՇՈԿ ԿԻՐԱՌԵԼՈՒ ՊԱՏՐԱՍՏՈՒԹՅՈ՞ՒՆ ԷՐ ՏԵՍՆՈՒՄ

Սյունաց Երկիր

«Դինո գոլդ մայնինգ քամփնի» ՓԲԸ տնօրեն Ռոբերտ Ֆալետտայի ուշացած պաշտոնանկությունը ցնծությամբ են ընդունել լեռնագործները։

Կապանյան հանրությունը շարունակում է քննարկել այդ պաշտոնանկության շարժառիթները: Շրջանառվում են արկածային ժանրին բնորոշ բազմաթիվ ասեկոսեներ, որոնց մի մասն առնչվում է տնօրենի եւ իր տիկնոջ ֆինանսական հեքիաթային խարդախություններին, սանձարձակությունների հասնող կամայականություններին: Եվ այդ խոսակցություններն ու քննարկումները տրամաբանական պիտի համարել. Կապանի լեռնահանքային ձեռնարկությամբ է մեծ չափով պայմանավորված մարզկենտրոնի սոցիալ-տնտեսական, հասարակական-քաղաքական պեյզաժը, եւ մարդիկ չեն կարող անտարբեր անցնել տեղի ունեցող իրադարձությունների կողքով: Մենք կփորձենք առավել իրազեկ աղբյուրների օգնությամբ առաջիկայում լույս սփռել տնօրենի պաշտոնանկության իրական պատճառների վրա, ինչի համար եւ առայժմ ձեռնպահ ենք մնում շրջանառվող վարկածների քննարկումից: Իսկ հիմա բավարարվենք «Արմենպրեսի» ս.թ. հունվարի 26-ի տարածած հաղորդագրությամբ, որում մասնավորապես ասված է. «Դինո գոլդ մայնինգ քամփնի» ՓԲԸ սեփականատեր «Dandee Precious Metals» կանադական ընկերության Բուլղարիայի եւ Հայաստանի պատասխանատու կառավարիչ Ռիք Հոուսը, ով հունվարի 24-ից Կապանում է, կատարել է առաջին կադրային փոփոխությունները: Նրա հրամանագրով աշխատանքից ազատվել է ընկերության տնօրեն Ռոբերտ Ֆալետտան:

Վերջինս ընկերությունը ղեկավարում էր 2008-ից, ազգությամբ իտալացի է, ԱՄՆ քաղաքացի, բնակվում է Մոսկվայում: Աշխատանքից ազատվել է նաեւ տնօրենի կինը` Ֆարիդա Ֆալետտան, ով ընկերությունում զբաղեցնում էր անվտանգության եւ ակտիվների պահպանության գծով մենեջերի պաշտոնը:

Տնօրենի պարտականությունները ժամանակավորապես դրվել են տնօրենի տեղակալ Ռոն Մոբլիի վրա: Հավելենք, որ կոմբինատի կապանցի աշխատակիցները մեծ ցնծությամբ են ընդունել տնօրենի պաշտոնանկության մասին լուրը: Ռ.Ֆալետտայի, հատկապես` նրա կնոջ հանդեպ դժգոհությունները շատ մեծ էին` սկսած մարդկանց նկատմամբ ունեցած վերաբերմունքից մինչեւ աշխատանքին առնչվող հարցերը:

Մենք խոստացանք ձեռնպահ մնալ սույն պաշտոնանկության շուրջ շրջանառվող վարկածների վաղաժամ քննարկումից: Մեկ-երկու տեղեկատվություն, այդուհանդերձ, չենք կարող չհաղորդել: Ըստ լավատեղյակ աղբյուրների՝ Ռոբերտ Ֆալետտան անհնազանդ հանքագործների հանդեպ էլեկտրաշոկ կիրառելու պատրաստություն էր տեսնում: Այդ մասին փոքր-ինչ ուշացումով է տեղեկացվել ընկերության սեփականատերը, ինչը եւ դարձել է առանձնահատուկ քննարկման առարկա: Մեկ այլ հարց էլ` կապված ընկերության պահեստներից մեկում արձանագրված մոտ մեկ միլիոն դոլարի հասնող պակասորդի-գողության հետ, քննության նյութ է դարձել իրավապահ մարմիններում:

Փետրվար 15, 2011


Առնչվող նյութեր


Կատեգորիա

ավելին
պակաս

Մարզեր