ԷկոԼուր
«Ալյումինա Քորփորեյշն» ընկերության ղեկավարները չներկայացան ընկերության իսկ կողմից նշանակված Թեժսարի նեֆելինային սիենիտների հանքավայրի շահագործման նախագծի հասարակական լսումներին: Լսումները նշանակված էին մայիսի 30-ին` Հրազդանի քաղաքապետարանի շենքում: Լսումների համար հավաքվել էին հասարակայնության, տեղական կառավարման մարմինների, հասարակական կազմակերպությունների, Բնապահպանության նախարարության ներկայացուցիչներ, ինչպես նաեւ նախագծողներ:
Ընկերությունն ուղարկել էր «Ալյումինա Քորփորեյշն»-ի տնտեսվար Վարուժ Ավագյանին, ով հրաժարվեց պատասխանել հարցերին. «Ձեռնարկության տնօրեն Էմին Կնյազյանը քաղաքում չէ: Ես եկել եմ, որ ասեմ, որ տնօրենն այստեղ չէ: Ես տնօրեն չեմ, էկոլոգ էլ չեմ եւ չեմ կարող պատասխանել ձեր հարցերին»:
Ներկաները հայտարարություն ստորագրեցին այն մասին, որ ընկերության մեղքով լսումները տապալվել են: Հարց է մնում, թե կառավարությունն ում է վստահում ռազմավարական հումքի արդյունահանումը, եթե ընկերությունն արդեն 2-րդ անգամ գործնականում ձախողում է հասարակական լսումները: Առաջին անգամ ընկերությունը հետաձգել էր մայիսի 3-ին նշանակված հասարակական լսումները` առանց որեւէ պատճառ նշելու:
Մայիս 30, 2012 at 20:01