

ԷկոԼուր
Կապանի հասարակայնությունը դիմել է քաղաքի ղեկավարությանը` Կապանի քաղաքապետ Արթուր Աթայանին և ավգանու անդամներին ուրանի ծրագրի վերաբերյալ ավագանու արտահերթ նիստ հրավիրել և միանալ ուրանի ծրագրի իրականացման դեմ «Ազատամարտ» կոմիտեի և «Կապանի տարածաշրջանի զարգացման» հիմնադրամի կողմից կազմակերպված ստորագրահավքին: 2010թ. հունիսի 1-ի հայտարարության մեջ գրված է.
«06.03.2008 թվականին Հայաստանի Հանրապետության կառավարությունը թիվ 234-Ն որոշմամբ թույլ է տվել «Հայ-ռուսական լեռնահանքային կազմակերպություն» ՓԲ ընկերությանը Հայաստանի ողջ տարածքում իրականացնել ուրանի հանքաքարերի երկրաբանական հետախուզման աշխատանքներ:
Այսօր արդեն Սյունիքի մարզի Լեռնաձոր համայնքում իրականացվում են ուրանի հանքաքարերի երկրաբանական հետախուզման աշխատանքները, և Լեռնաձոր համայնքի ղեկավարը բնակիչների հետ միասին ոչ են ասել ուրանի հետ կապված բոլոր տեսակի աշխատանքներին իրենց համայնքում:
2010 թվականի մայիսի 24-ին Կապանի Օրհուս կենտրոնում վերոհիշյալ խնդրի վերաբերյալ կայացած քննարկման ժամանակ «Սյունիքի քաղաքացիական հասարակության զարգացման» հասարակական կազմակերպության նախագահն առաջարկեց դուրս գալ քննարկումների և լսումների փուլից և քայլ առ քայլ առաջ շարժվել, իսկ «Հայաստանի Երիտասարդ Իրավաբանների ասոցիացիա» հասարակական կազմակերպության Սյունիքի մարզային մասնաճյուղի նախագահն առաջարկեց դիմել Կապանի քաղաքային համայնքի ղեկավարին և ավագանու անդամներին:
Կապանում գործող մի շարք հասարակական կազմակերպություններ ԶԼՄ-ներով և քննարկման միջոցով արդեն իսկ արտահայտել են իրենց կոշտ դիրքորոշումը վերոհիշյալ խնդրի վերաբերյալ, իսկ կազմակերպություններից երկուսը` «Ազատամարտ» կոմիտեն և «Կապանի տարածաշրջանի զարգացման» հիմնադրամը սկսել են ստորագրահավաք: Համոզված ենք, որ Ձեր օժանդակությամբ և մասնակցությամբ ստորագրահավաքը կիրականանա լիարժեք, և կապանցիները, այդ միասնականությունը տեսնելով, ակտիվորեն կմասնակցեն ստորագրահավաքին:
«Էկոլոգիական Անվտանգության Ապահովման և Ժողովրդավարության զարգացման» հասարակական կազմակերպությունը վերոհիշյալ խնդրի վերաբերյալ դիմել էր Հայաստանի Հանրապետության էներգետիկայի և բնական պաշարների նախարարությանը, և նախարարության գրավոր պատասխանից պարզվեց, որ հունիս ամսվա առաջին կեսին «Հայ-ռուսական լեռնահանքային կազմակերպություն» ՓԲ ընկերությունը կկազմակերպի քննարկում Կապան քաղաքում, և որպեսզի քննարկման ժամանակ հստակ բարձրաձայնվի կապանցիների որոշումը, անհրաժեշտ է Կապան համայնքի ընտրյալների` այսինքն Ձեր որոշումը վերոհիշյալ խնդրի վերաբերյալ»:
Հայտարարության տակ ստորագրել են Կապանի Օրհուս կենտրոնի համակարգող Աշոտ Ավագյանը, «Սյունիքի քաղաքացիական հասարակության զարգացման» ՀԿ-ի նախագահ Տիգրան Ստեփանյանը, «Հայաստանի Երիտասարդ Իրավաբանների ասոցիացիա» ՀԿ-ի Սյունիքի մարզային մասնաճյուղի նախագահ Արտուշ Խալափյանը, «Խուստուփ» ՀԿ-ի նախագահ Վլադիկ Մարտիրոսյանը, «Էկոլոգիական Անվտանգության Ապահովման և Ժողովրդավարության զարգացման» ՀԿ-ի իրավախորհրդատու Արթուր Ղազարյանը:
Հունիս 08, 2010
