News.am
Հայաստանի ատոմային էլեկտրակայանի ավելի քան 370 աշխատակիցներ արձագանքել են ՀԱԷԿ-ի մի խումբ աշխատակիցների` Սերժ Սարգսյանին ուղղված նամակին, որտեղ խոսք էր գնում ՀԱԷԿ-ում տիրող «անառողջ, եւ անարդար» մթնոլորտի մասին:
Ստորեւ ներկայացնում ենք Ատոմակայանի աշխատակիցների հայտարարությունը, որի տակ իրենց ստորագրությունն են դրել ՀԱԷԿ-ի ավելի քան 370 աշխատակիցներ: Նրանք Սերժ Սարգսյանին ուղղված նամակը համարում են «զրպարտչական» եւ նշում, որ «հանրապետության համար կարեւոր ստրատեգիական նշանակություն ունեցող օբյեկտում` ՀԱԷԿ-ում տիրող անառողջ մթնոլորտի, կադրային քաղաքականության, նրա Գլխավոր Ճարտարագետի մասին այդ հայտարարությունը վրդովմունքի ալիք է բարձրացրել կուռ, համերաշխ, իր գործին նվիրված անձնակազմի շարքերում»:
«Վերը նշված հաղորդագրության մեջ ատոմակայանի աշխատողների իբրեւ թե «մի խմբի» հիշատակված դիմում-հայտարարությունը իրականում իրենից ներկայացնում է մի անստորագիր նամակ, որի հետ ատոմակայանի կոլեկտիվը ոչ մի առնչություն չունի: Զրպարտիչ հայտարարության մեջ նշված փաստերը ընդամենը հեղինակի` իր իսկ խոսքերով ասած «ճղճիմ» երեւակայության արդյունքն են»,- ասված է ՀԱԷԿ-ի աշխատակիցների հայտարարության մեջ:
Ատոմակայանի աշխատակիցները վրդովված են, որ նման նամակով ստվեր է գցվում «ատոմակայանի կոլեկտիվի եւ նրա ղեկավարության բարի համբավի վրա, ում գերագույն նպատակը հանդիսանում է ՀԱԷԿ-ի անվտանգությունը»:
Հայտարարությանը կցված են ՀԱԷԿ-ի անձնակազմի ստորագրությունները, որտեղ կա 377 ստորագրություն:
Նշենք, որ ՀԱԷԿ-ի աշխատակիցներից մի քանիսը նաեւ զանգահարել են NEWS.am-ի խմբագրություն եւ հայտնել, որ Սերժ Սարգսյանին ուղղված նամակ իսկապես եղել է, որը, սակայն բոլորովին այլ բովանդակություն է ունեցել եւ կապ չունի մամուլում հրապարակված նամակի հետ: Ըստ այդմ, իրականում ՀՀ նախագահին ուղղված նամակում խոսք է գնացել միայն աշխատավարձերի հետ կապված խնդրի հետ:
Ավելի վաղ NEWS.am-ը հայտնել էր, որ Հայաստանի Ատոմային Էլեկտրակայանի աշխատողների մի խումբ հանդես է եկել դիմում հայտարարությամբ, որտեղ բողոքում է ԱԷԿ-ում տիրող «անառողջ, ճղճիմ եւ անարդար» մթնոլորտից:
Սեպտեմբեր 22, 2011 at 12:56