

ԱՌԿԱ
Հայաստանի նախագահ Սերժ Սարգսյանը ստորագրեց «Հայաստանի Հանրապետությունում նոր միջուկային էներգաբլոկ(ներ)ի կառուցման մասին» օրենքը: Այս մասին «Առկա» գործակալությանը տեղեկացրին ՀՀ նախագահի մամլո գրասենյակից:
Հոկտեմբերի 27-ին ՀՀ ԱԺ-ի կողմից ընդունված օրենքը 1,2 հազար մեգավատ հզորությամբ ատոմային նոր էներգաբլոկի (բլոկների) կառուցման հնարավորություն է նախատեսում, որի շահագործման ժամկետը կկազմի 60 տարի:
Փաստաթղթով սահմանվում է նաեւ նմանատիպ օբյեկտների կառուցման հրապարակի եւ նախապատրաստման, կառուցման եւ բլոկի (բլոկների) շահագործման ընթացքում անվտանգության նկատմամբ հիմնական պահանջները, որոշվում են անցկացվող աշխատանքների մասին բնակչությանը տեղեկացնելու վերաբերյալ Հայաստանի կառավարության պարտավորությունները:
Հայաստանում նոր ատոմային էներգաբլոկի կառուցման համար նախնական տվյալներով կպահանջվի մոտ 4-5 միլիարդ դոլլար, իսկ կառուցման ճշգրիտ արժեքը կախված է էներգաբլոկի հզորությունից եւ պարզ կդառնա բոլոր անհրաժեշտ հետազոտություններից հետո:
Ինչպես վաղօրոք հայտարարեց ՀՀ էներգետիկայի եւ բնական պաշարների նախարար Արմեն Մովսիսյանը, նախապատրաստման եւ 1-1,2 հազար մեգավատ հզորությամբ նոր էներգաբլոկի կառուցման գործընթացի ճշգրիտ կազմակերպման դեպքում նախագծի ֆինանսավորման հարցում խնդիրներ չեն լինի:
Նախարարը նկատեց, որ անցկացված բոլոր նախնական հետազոտությունները ցույց են տվել, որ ամենալավ տարբերակը Հայաստանի գործող ատոմային էլեկտրակայանի հիմքի վրա նոր էներգաբլոկի (բլոկների) կառուցումն է, այն էլ որ նրա հզորությունը կազմում է 400 մեգավատ, այն դեպքում երբ կայանի հրապարակը նախատեսում է 1,2 հազար մեգավատ հզորությամբ բլոկի շահագործման հնարավորություն:
Գործող հայկական ԱԷԿ-ը տեղակայված է Մեծամոր քաղաքի մոտակայքում (Երեւանից մոտ 20-30կմ հարավ): Կայանը շահագործման է հանձնվել 1976 թվականին, ներկայումս գործում է միայն կայանի 407,5 մեգավատ հզորությամբ երկրորդ բլոկը:
Նոյեմբեր 19, 2009
