Հոկտեմբերի 6-ին ՀՀ կառավարությունը հաստատեց ՀՀ հողային ֆոնդի առկայության և բաշխման վերաբերյալ 2022թ. հաշվետվությունը: Մեկ տարվա ընթացքում գյուղատնտեսական նշանակության հողերի մակերեսը կրճատվել է, արդյունաբերական, էներգետիկ նշանակության հողերի մակերեսը՝ ավելացել: Գյուղատնտեսական նշանակության հողերի մակերեսը կրճատվել է 400 հեկտարով: Եթե 2021թ. այն կազմել է 2,042,480 հա, ապա 2022թ. հուլիսի 1-ի դրությամբ՝ 2,042,080 հա:
Նվազել են նաև արոտավայրերի մակերեսները: 2021թ. ունեցել ենք 1,049,870 հա, իսկ 2022թ.՝ 1,049,660 հա արոտավայր:
2021-2022թթ. ընթացքում կրճատվել են հատուկ պահպանվող տարածքների ու անտառային հողերը: Մասնավորապես, հատուկ պահպանվող տարածքների մակերեսը նվազել է 10 հեկտարով, անտառային հողերինը՝ 160 հեկտարով: 2021թ. հատուկ պահպանվող տարածքների մակերեսը զբաղեցրել է 335,470 հա, անտառային հողերինը՝ 334,010 հեկտար տարածք: 2022թ. հատուկ պահպանվող տարածքների մակերեսը կազմել է 335,460 հեկտար, անտառային հողերինը՝ 333,850 հեկտար:
Մյուս կողմից ավելացել են արդյունաբերության, ընդերքօգտագործման և այլ արտադրական նշանակության և էներգետիկայի, տրանսպորտի, կապի, կոմունալ ենթակառուցվածքների օբյեկտների հողերի մակերեսները: Այսպես՝ 2021թ. Հայաստանում արդյունաբերության, ընդերքօգտագործման և այլ արտադրական նշանակության հողերի մակերեսը կազմել է 38,970 հա, էներգետիկայի, տրանսպորտի, կապի, կոմունալ ենթակառուցվածքների օբյեկտների հողերի մակերեսը՝ 14,050 հա: 2022թ. առաջինը կազմել է 39,520, իսկ երկրորդը՝ 14,110 հա:
Հոկտեմբեր 10, 2022 at 14:48