

ԷկոԼուր
72 տարեկան հասակում կյանքից հեռացավ շրջակա միջավայրի պաշտպան, Հայաստանի Գիտությունների ազգային ակադեմիայի թղթակից անդամ Ռաֆայել Հովհաննիսյանը: Ընդգրկուն էր նրա գիտական գործունեության ոլորտը: Նա զբաղվում էր էկոլոգիայով, շրջակա միջավայրի ուսումնասիությամբ, լիմնոլոգիայով, Ֆունկցիոնալ եւ պրոդուկցիոն ջրակենսաբանությամբ, ջրային էկոհամակարգերի մաթեմատիկական մոդելավորմամբ: Նա ՀՀ Ճարտարագիտական ակադեմիայի, Միջազգային էկոլոգիական ակադեմիայի, Ռուսաստանի բնական գիտությունների ակադեմիայի, Ազգային անվտանգության պրոբլեմների գիտությունների միջազգային ակադեմիայի իսկական անդամ էր:
Նրա կյանքի գլխավոր գործը Սեւանն էր: Մինչեւ 2006թ-ը Ռաֆայել Հովհաննիսյանը գլխավորում էր ՀՀ ԳԱԱ-ի Հիդրոէկոլոգիայի եւ ձկնաբանության ինստիտուտը: 2002թ-ից մինչ իր մահը ՀՀ ԳԱԱ-ին առընթեր Սեւանա լճի պահպանության փորձագիտական հանձնաժողովի նախագահի տեղակալն էր: Նա մեծ ջանքեր է գործադրել լճի յուրահատուկ էկոհամակարգի պահպանման համար: Մենք հատկապես բարձր ենք գնահատում Ռաֆայել Հովհաննիսյանի ներդրումը «Սեւանա լճի մասին» օրենքի ստեղծման եւ մշակման գործում, Սեւանա լճի ջրահավաք ավազանում արտադրության տեղակայման դեմ պայքարի գործում, մասնավորապես` Սեւանա լճի ավազանում գտնվող Սոտքի ոսկու հանքավայրում ոսկու կորզման ֆաբրիկայի կառուցման դեմ պայքարի գործում:
Ռաֆայել Հովհաննիսյանն արժանացել է ՅՈՒՆԵՍԿՕ-ի «Մարդը և բնությունը» հանձնաժողովի պատվոգրի, Համամիութենական հիդրոկենսաբանական ընկերության, Սևանի քաղաքային և գործադիր խորհրդի պատվոգրերի:
Նրա հիշատակը միշտ վառ կմնա մեր սրտերում:
Հոկտեմբեր 24, 2011 at 14:41
