ԷկոԼուր
Երևանի քաղաքապետ Տարոն Մարգարյանը, աշխատանքային հերթական խորհրդակցության ժամանակ անդրադարձել բնապահպաններին մտահոգող երկու հարցերի` Դալմայի այգիներին եւ Մաշտոցի պուրակին: Ինչպես տեղեկացնում է Երեւանի քաղաքապետարանի պաշտոնական կայքը, Տարոն Մարգարյանն ասել է, որ Լենինգրադյան փողոցը Իսկակովի պողոտային կապող նոր 2.6 կմ երկարությամբ ավտոմայրուղին ոչ մի ծառի չի վնասի: «Ավտոմայրուղին անցնելու է Դալմայի այգիների սահմանի հարակից տարածքով: Գլխավոր հատակագծի համաձայն՝ նշված տարածքն ընդգրկված է նախագծային ավտոմայրուղու անցումային հատվածում, և շինարարական աշխատանքների ընթացքում ոչ մի այգի չի վնասվելու և ոչ մի ծառ չի հատվելու: Անհրաժեշտության դեպքում քաղաքապետարանի բնապահպանության վարչության կողմից հատուկ տեխնիկայի միջոցով կիրականացվի ծառերի վերատնկում»,- նշել է քաղաքապետը: Անդրադառնալով Մաշտոցի պուրակին` Տարոն Մարգարյանն ասել է, որ եղանակային պայմանների բարելավմամբ կմեկնարկեն Մաշտոցի պողոտայի և Կողբացու փողոցի միջնամասում գտնվող պուրակի բարեկարգման և կանաչապատման աշխատանքները:
«Այս տարի մենք նախատեսում ենք կրկնապատկել նախորդ տարիներին նախատեսված և կատարված աշխատանքները: «Կանաչ Երևան» կարգախոսին համապատասխան` ակնկալում ենք ավելացնել մայրաքաղաքի կանաչ գոտիներն ու հետևողական աշխատանք տանել դրանց մշտական խնամքի ապահովման ուղղությամբ»,- նշել է Տարոն Մարգարյանը:
Լուսանկարը` Տիգրան Սարգսյանի
Մարտ 15, 2012 at 15:19