ԷկոԼուր
Մագելի քարանձավը վարձակալության չի հանձնվի։ Ինչպես տեղեկացնում է ՀՀ մշակույթի նախարարությունը, սույն թվականի մայիսի 5-ին ՀՀ մշակույթի նախարարությունում տեղի է ունեցել ՀՀ Վայոց ձորի մարզի «Մագելանի» քարանձավը վարձակալության հանձնելու բաց մրցույթի մրցութային հանձնաժողովի նիստը:
Մրցույթին ներկայացվել էր 2 հայտ` «Ինկար» ՍՊԸ և քաղաքացի Գեղամ Գինոսյանի կողմից: Հանձնաժողովը մրցույթը համարել է չկայացած, քանի որ, հիմք ընդունելով «Հրապարակային սակարկությունների մասին» ՀՀ օրենքի 25-րդ հոդվածի 2-րդ մասի 2-րդ կետի պահանջները, քաղաքացի Գեղամ Գինոսյանի կողմից ներկայացված հայտը չի համապատասխանել հրավերի պահանջներին եւ հայտը մերժվել է: Մերժվել է նաեւ «Ինկար» ՍՊԸ-ի կողմից ներկայացված հայտը, քանի որ հայտին կից ներկայացված շրջակա միջավայրի վրա ազդեցության գնահատման վերաբերյալ բնապահպանական փորձաքննության դրական երակացությունը (տրված 19.05.2011 թ.) ժամկետանց է: Հիշեցնենք, որ Մագելի քարանձավում «Ինկար» ՍՊԸ-ն ցանկանում էր տուրիզմ զարգացնել՝ քարանձավում տուրիստական երթուղիներ ստեղծելով։
ՀՀ Վայոց ձորի մարզի Նորավանքի կիրճում գտնվող Մագելի քարանձավը հայտնի է իր հարուստ կենսաբազմազանությամբ, ՀՀ Կարմիր գրքում եւ միջազգային IUCN ցուցակում գրանցված տեսակներով: Այն Հայաստանի ամենաերկար քարանձավն է, պատմամշակութային հուշարձան է։
Այս քարանձավում կար Կարմիր գրքում գրանցված չղջիկների հինգ տեսակ, որից մեկը այսօր ոչնչացվել է։ Մասնագետների խոսքերի համաձայն՝ մարդկային գործոնի արդյունքում քարանձավում բնակվող չղջիկների 60-70%-ն այսօր պակասել է։
Մայիս 07, 2014 at 12:50