2022թ. մարտի 21-ին «ԷկոԼուր» մամուլի ակումբում տեղի ունեցավ Հայաստանի քաղաքացիական հասարակության ներկայացուցիչների հանդիպումը ՄԱԿ-ի Եվրոպայի տնտեսական հանձնաժողովի (UNECE) տարածաշրջանային գրասենյակի կառավարման և օրենսդրության գծով տարածաշրջանային համակարգող Մարիաննա Բոլշակովայի հետ: Հանդիպմանը մասնակցել են «ԷկոԼուր» տեղեկատվական ՀԿ-ի նախագահ Ինգա Զարաֆյանը, ՀԿ-ի լրագրող Քրիստինա Տեր-Մաթևոսյանը, «Հայաստանի անտառներ» ՀԿ-ի տնօրեն Նազելի Վարդանյանը, «Կանաչ Հայաստան» ՀԿ-ի նախագահ Թեհմինե Ենոքյանը, «Դալմա Սոնա հիմնադրամ» ՀԿ-ի նախագահ Ռուզաննա Ղազարյանը, «Համայնքային համախմբման և աջակցության կենտրոն» ՀԿ-ի նախագահ Օլեգ Դուլգարյանը և «Հայաստանի բնապահպանական ճակատ» նախաձեռնության անդամ, աշխարհագրագետ Լևոն Գալստյանը: Հանդիպմանն առցանց մասնակցեցին նաև Ինֆորմացիայի ազատության կենտրոնի նախագահ Շուշան Դոյդոյանը և Ջերմուկի բնակիչ Գերասիմ Մուշեղյանը:
ՄԱԿ-ի Եվրոպական տնտեսական հանձնաժողովի կողմից ներկայում Հայաստանում իրականացվում է բնապահպանական կատարողականի վերանայում, որը դիտարկում է պետության կողմից իրականացվող բնապահպանական կառավարման արդյունավետությունը:
Մարիաննա Բոլշակովան նշեց. «Ես զբաղվում եմ հասարակության մասնակցության, տեղեկատվության հասանելիության և արդարադատության վերաբերյալ տեղեկատվության հասանելիության հարցերով, դիտարկում՝ Օրհուսի կոնվենցիայի կիրակումը պրակտիկայում և Հայաստանի օրենսդրության մեջ: Մեզ հետաքրքիր է, թե ինչի հետ եք բախվել որպես տվյալ ոլորտում աշխատող ՀԿ-ներ, բնապահպանական իրավունքներ պաշտպանող ՀԿ-ների նկատմամբ ի՞նչ վերաբերմունք կա, կա՞ ճնշում մասնավոր կամ պետական սեկտորի կողմից, և ինչպիսի՞ն է արդարադատության հասանելիությունը»:
Հանդիպման մասնակիցները ներկայացրեցին Հայաստանում բնապահպանական ոլորտում առկա իրավիճակը, նշեցին հստակ օրինակներ՝ Ամուլսարի ոսկու հանքի շահագործման ծրագրի հետ կապված խնդիրները, Դալմայի այգիների զավթման և ոչնչացման խնդիրները և դրա հետ կապված Օրհուսի կոնվենցիայի համապատասխանության կոմիտեի որոշումն ուղղված ՀՀ կառավարությանը, կառավարություն-քաղաքացիական հասարակություն փոխհարաբերությունների հետ կապված խնդիրները: Մասնակցիները նշեցին նաև քաղաքացիական հասարակության ակտիվ անդամների վրա գործադրվող ճնշումների կոնկրետ օրինակներ:
Մարտ 24, 2022 at 13:39