

Գայանե Մկրտչյան, ԱրմենիաՆաու
Դեկտեմբերի 14-ին, կառավարության շենքի առջևից դեպի Ազգային ժողով մեկնարկած երթի մասնակիցները բողոքում էին ԱԺ արտահերթ նստաշրջանի օրակարգում ընդգրկված «Շրջակա միջավայրի վրա ազդեցության փորձաքննության մասին» օրենքում կատարվող փոփոխությունների դեմ:
ՀՀ կառավարության որոշմամբ` այդ օրենքում նախատեսվող փոփոխությամբ քաղաքաշինության ոլորտում նախատեսվող գործունեության փորձաքննության իրականացման համար ժամկետը սահմանվում է առավելագույնը 40 օր` նախկին 120 օրվա փոխարեն: Իսկ եթե այդ ժամկետում լիազորված մարմնի կողմից ձեռնարկողին (գործունեության) պատաuխան չի տրվում, ապա փորձաքննական եզրակացությունը համարվում է դրական:
Ըստ նույն որոշման` շրջակա միջավայրի վրա ազդեցության փորձաքննության ենթակա կլինեն գործող 1000 քմ-ի փոխարեն 1500 քմ նվազագույն տարածք ունեցողները:
Բնապահպանության նախարար Արամ Հարությունյանն ասում է, որ օրենքի փոփոխության նպատակն է բարելավել գործարար միջավայրը Հայաստանում:
«Կարողանանք քաղաքաշինության բնագավառում խթան հանդիսանալ և ավելի արագ իրականացնենք շրջակա միջավայրի վրա ազդեցության փորձաքննությունը»,- ասում է Հարությունյանը:
Հայաստանի (սոցիալ-էկոլոգիական) կանաչների կուսակցությունը հանդես է եկել հայտարարությամբ, որում նշվում է, որ կատարվող փոփոխությունը հնարավորություն կտա գործարարներին անվերադարձ ոչնչացնել այն փոքրաթիվ կանաչ տարածքները (1990-ականների Երևանի մեկ շնչին ընկնող 16 քմ-ից մնացել է 4-5 քմ կանաչ տարածք) և քաղաքները վերածել համատարած անապատի:
Ըստ ընդդիմադիր «Ժառանգություն» խմբակցության անդամ Զարուհի Փոստանջյանի` 40-օրյա ժամկետում լուրջ փորձաքննություն հնարավոր չէ անցկացնել:
«Երևանում, ինչպես նաև Հայաստանի մի շարք խոշոր քաղաքներում շինարարություն իրականացնելու նպատակով շատ քիչ տարածքներ են մնացել, այդ պատճառով էլ շինարարություն կիրականացվի կանաչ և բակային տարածքների հաշվին»,- ասում է նա:
ԲՈՂՈՔԻ ԱԿՑԻԱ ԸՆԴԴԵՄ ԼԵԶՎԻ ԵՎ ԲՆԱՊԱՀՊԱՆԱԿԱՆ ՕՐԻՆԱԳԾԵՐԻ
Հասմիկ Սմբատյան, «Ազատություն» ռադիոկայան
«Մենք դեմ ենք օտարալեզու դպրոցների վերաբացմանը» քաղաքացիական նախաձեռնության անդամները եւ մի խումբ բնապահպաններ երեքշաբթի օրը բողոքի ակցիա եւ երթ անցկացրին ԱԺ արտահերթ նստաշրջանում ընդգրկված մի շարք օրենսդրական նախաձեռնությունների դեմ:
«Լեզու, դպրոց, մաքուր օդ» վանկարկումներով ակցիայի մասնակիցները իրենց բողոքն էին արտահայտում «Լեզվի մասին» եւ «Հանրակրթության մասին» ՀՀ օրենքների, ինչպես նաեւ «Շրջակա միջավայրի վրա ազդեցության փորձաքննության մասին» ՀՀ օրենքում առաջարկվող, բողոքավորների ձեւակերպմամբ` հապճեպ փոփոխությունների դեմ` Կառավարությունից պահանջելով հետ կանչել նախագծերը:
«Ինչպես եղել է տարին, այնպես էլ այս արտահերթ նստաշրջանը: Այնպիսի օրինագծեր են անցել այդ արտահերթ նստաշրջան, որ ցնցող բույլ է: Մենք եկել ենք կառավարությունից պահանջելու, որպեսզի իր նախագծերը դուրս հանի` թե բնապահպանական, թե օտարալեզու դպրոցների հետ կապված», - ասաց «Մենք դեմ ենք օտարալեզու դպրոցների վերաբացմանը» նախաձեռնության անդամ Արմեն Հովհաննիսյանը:
Ակցիայի մասնակիցները պաստառներով եւ կոչերով Կառավարության շենքից երթով շարժվեցին նախ Կրթության եւ գիտության նախարարություն, այնուհետեւ Ազգային Ժողով եւ Նախագահի նստավայր:
«Մենք դեմ ենք օտարալեզու դպրոցների վերաբացմանը» նախաձեռնող խմբին միացած բնապահպանները իրենց անհանգստությունը հայտնեցին «Շրջակա միջավայրի վրա ազդեցության փորձաքննության մասին» օրենքի նախատեսվող փոփոխությունների վերաբերյալ:
«Սա մի ճանապարհ է օլիգարխների հետագա գործունեությունը հարթելու համար», - ասաց «Թռչնասերների կենտրոն» հասարակական կազմակերպության նախագահ Սիլվա Ադամյանը:
Այս փոփոխությամբ քաղաքաշինության ոլորտում նախատեսվող գործունեության փորձաքննության իրականացման համար ժամկետը սահմանվում է առավելագույնը 40 օր` օրենքով նախատեսված 120-օրյա ժամկետի փոխարեն, իսկ այդ ժամկետում լիազորված մարմնի կողմից ձեռնարկողին պատասխան չտալու դեպքում փորձաքննական եզրակացությունը համարվում է դրական: Ընդ որում մինչեւ 1500 քառակուսի մետր քաղաքաշինական ծրագրերն ընդհանրապես փորձաքննության չեն ենթարկվելու:
«Առանց այդ էլ Երեւանը խեղդվում է հակաէկոլոգիական կառուցապատման մեջ, հիմա եթե դա էլ ընդունվի, նշանակում է` քաղաքաշինությունը կդառնա բացարձակ անվերահսկելի», - ասաց «Հանուն կայուն մարդկային զարգացման» հասարակական կազմակերպության նախագահ Կարինե Դանիելյանը:
Դեկտեմբերի 13-ին օրինագիծը քննարկվել է Ազգային ժողովի գյուղատնտեսական եւ բնապահպանական հարցերի մշտական հանձնաժողովում: Բնապահպանության նախարարը հայտարարել է, թե տարեվերջին նման փոփոխություն կատարելու անհրաժեշտությունը նպատակ ունի բարելավել գործարար միջավայրը:
ՆԱԽԱՏԵՍՎՈՒՄ Է ՇՐՋԱԿԱ ՄԻՋԱՎԱՅՐԻ ՎՐԱ ԱԶԴԵՑՈՒԹՅԱՆ ՓՈՐՁԱՔՆՆՈՒԹՅՈՒՆԸ ԱՎԵԼԻ ԿԱՐՃ ԺԱՄԿԵՏՈՒՄ ԻՐԱԿԱՆԱՑՆԵԼ
Կարինե Քալանթարյան, «Ազատություն» ռադիոկայան
Ազգային ժողովի արտահերթ նստաշրջանի օրակարգում ընդգրկված «Շրջակա միջավայրի վրա ազդեցության փորձաքննության մասին» օրենքի հապճեպ լրացումները, ըստ բնապահպանության նախարարի, նպատակ ունեն բարելավել գործարար միջավայրը:
Երկուշաբթի օրը օրինագիծը քննարկվեց Ազգային ժողովի գյուղատնտեսական եւ բնապահպանական հարցերի մշտական հանձնաժողովում:
Կառավարությունն առաջարկում է օրենքում լրացում կատարել այն դեպքում, երբ մի քանի ամսից նախատեսվում է ամբողջությամբ փոփոխության ենթարկել այս օրենքը:
Ըստ առաջարկվող լրացման` քաղաքաշինության ոլորտում նախատեսվող գործունեության վերաբերյալ փորձաքննական եզրակացությունը ձեռնարկողին է տրվում է փաստաթղթերը ստանալուց առնվազն 15-օրյա ժամկետում: Եթե սահմանված ժամկետում լիազորված մարմինը ձեռնարկողին պատասխան չի տալիս, ապա փորձաքննական եզրակացությունը համարվում է դրական: Ընդ որում մինչև 1500 քառակուսի մետր քաղաքաշինական ծրագրերն ընդհանրապես փորձաքննության չեն ենթարկվելու: Գործող օրենքով սահմանված է 120-օրյա ժամկետ:
«Մենք այս փոփոխությունը ներկայացրել ենք, որպեսզի առաջին հերթին բարելավվի գործարար միջավայրը, եւ կարողանանք քաղաքաշինության բնագավառում խթան հանդիսանանք եւ ավելի արագ իրականանցնենք շրջակա միջավայրի վրա ազդեցության փորձաքննությունը», - ասաց Բնապահպանության նախարար Արամ Հարությունյանը` պատասխանելով հարցին, թե որն է տարեվերջին նման փոփոխություն կատարելու անհրաժեշտությունը:
Դաշնակցական պատգամավոր Արա Նռանյանը կարծում է, որ այս ժամկետները կրճատելով կառավարությունը իր առջեւ նպատակ է դրել Համաշխարհային բանկի «Doing Business» ամենամյա զեկույցում լավագույն 20-յակում տեղ զբաղեցնել:
Բնապահպան Կարինե Դանիելյանի հարցին, թե արդյո՞ք հանրային քննարկումներ եղել են այս փոփոխության շուրջ, նախարար Հարությունյանը բացասական պատասխան տվեց:
«Չի եղել, բա ինչպե՞ս է մտել Ազգային ժողով, սա հարց է», - արձագանքեց Դանիելյանը:
Նա նաեւ տեղեկացրեց, որ նախատեսվող փոփոխությունը լրջորեն մտահոգում է բնապահպանական հասարակական կազմակերպություններին:
«Փաստորեն սրանով բոլոր կոնվենցիաները խախտվում են: Մեր կարծիքով, քաղաքաշինությունը Երեւանում, արդեն Ջերմուկում դարձել է դժբախտություն: Բացարձակ հակաէկոլոգիական քաղաքաշինություն է իրականացվում», - ասաց բնապահպանը:
Ընդդիմադիր «Ժառանգություն» խմբակցության անդամ Զարուհի Փոստանջյանն էլ պնդում է, որ 15-օրյա ժամկետում լուրջ փորձաքննություն հնարավոր չէ անցկացնել: Նրա կարծիքով` Երեւանում, ինչպես նաեւ Հայաստանի մի շարք խոշոր քաղաքներում շինարարություն իրակացնելու նպատակով շատ քիչ տարածքներ են մնացել, այդ պատճառով էլ շինարարություն կիրականացվի կանաչ եւ բակային տարածքների հաշվին:
Մշտական հանձնաժողովի նիստում առաջարկներ եղան հետաձգել օրինագծի քննարկումը խորհրդարանի ընդլայնված նիստում, ինչը չընդունվեց: Ի վերջո բնապահպանության նախարարն ու նիստին մասնակցող պատգամավորների գերակշռող մասը համաձայնեցին փորձաքննության համար 15-ի փոխարեն 40-օրյա ժամկետ սահմանել: Օրինագիծը խորհրդարանի ընդլայնված նիստում հավանաբար վաղը կքննարկվի:
Դեկտեմբեր 15, 2010
