ԷկոԼուր

ԷկոԼուրը դատապարտում է էլեկտրաէներգիայի թանկացման դեմ խաղաղ ցույց իրականացնող քաղաքացիների և իրենց մասնագիտական պարտականությունները կատարող լրագրողների հանդեպ ՀՀ ոստիկանության կողմից կիրառած բռնությունները:  

Հիշեցնենք, որ հունիսի 23-ին՝ ժամը 05:30-ի սահմաններում, ՀՀ ոստիկանությունը ջրցան մեքենայի միջոցով ցրեց ամբողջ գիշեր Բաղրամյան փողոցում ընթացող էլեկտրաէներգիայի թանկացման դեմ նստացույցը:

Նստացույցի մասնակիցներին ու լրագրողներին ոստիկանությունը, այդ թվում քաղաքացիական հագուստով ոստիկանները դաժան կերպով ծեծելով և հայհոյելով  բերման են ենթարկել ոստիկանության տարբեր բաժանմունքներ: Բերման են ենթարկվել ավելի քան 230 հոգի:

Մամուլում տարածված տեղեկությունների համաձայն՝ բռնությունների միջոցով լրագրողներից բերման են ենթարկվել «Հետքի» լրագրողներ Անի Հովհաննիսյանը և Հրանտ Գալստյանը, «Գալա» հեռուստաընկերության լրագրող Փայլակ Ֆահրադյանը, Հայկական ժամանակ օրաթերթի լրագրող Մկրտիչ Կարապետյանը, panarmenian.net-ի ֆոտոլրագրող Կարապետ Սահակյանը, news.am-ի լրագրող Արսեն Սարգսյանը, Epress.am-ի  օպերատոր Տիգրան Հակոբյանը, «Ժամը» լրատվականի լրագրող Դավիթ Դավթյանին ու օպերատոր Խաչատուր Եսայանին: Ոստիկանները նաև խլել և կոտրել են լրագրողների տեսախցիկները և լուսանկարչական ապարատները:

Բազմաթիվ քաղաքացիներ վնասվածքներ են ստացել, ոմանք գտնվում են հիվանդանոցներում:

Հիշեցնենք, որ հունիսի 17-ին Հանրային ծառայությունները կարգավորող հանձնաժողովը էլեկտրաէներգիայի սակագինը թանկացրեց 6.93 դրամով՝ մեկ  կՎտ/ժ-ի դիմաց 41.85 դրամից դառնալով 48.78 դրամ։

Ոստիկանության հայտարարությունը՝ Բաղրամյան պողոտայում տեղի ունեցածի վերաբերյալ 

Խախտված հասարակական կարգի վերականգնման անհրաժեշտությամբ պայմանավորված՝ Բաղրամյան պողոտայում անօրինական երթ կազմակերպած քաղաքացիներին ՀՀ ոստիկանությունը տեւական բանակցությունների միջոցով առաջարկել է ազատել հավաքի վայրը: Միաժամանակ, հավաքի մասնակիցներին բարձրախոսով մի քանի անգամ հայտարարվել է, որ նրանց պահանջները պատրաստ է լսել Հայաստանի Հանրապետության Նախագահը: Ոստիկանության կոչերը եւ խնդրանքները երթի կազմակերպիչների կողմից անտեսվել են: 

«Հավաքների ազատության մասին» Հայաստանի Հանրապետության օրենքի 29-րդ հոդվածի համաձայն՝ ժամը 22.00-ից մինչեւ 8.00-ն բնակելի եւ այլ շինություններին հարող տարածքներում անցկացվող հավաքները չեն կարող զուգորդվել անձանց հանգիստը խանգարող աղմուկով կամ լուսային ազդանշաններով: Նույն օրենքի 33-րդ հոդվածի 1-ին մասի համաձայն՝ հավաքը դադարեցվում է, եթե այլ կերպ հնարավոր չէ կանխել այլ անձանց սահմանադրական իրավունքների եւ հանրության շահի անհամաչափ սահմանափակումը:

Առաջնորդվելով նշված իրավադրույթներով՝ հավաքը դադարեցնելու պահանջով ոստիկանությունը դիմել է հավաքի ղեկավարներին: Հավաքի ղեկավարների կողմից ոստիկանության պահանջը չի կատարվել: Ոստիկանությունը հավաքի մասնակիցներից բազմիցս պահանջել է դադարեցնել անօրինական հավաքը, որի համար սահմանվել է ողջամիտ ժամկետ: Հավաքի մասնակիցներին նախազգուշացվել է սահմանված ժամկետում հավաքը կամովին չդադարեցնելու դեպքում օրենքով սահմանված հատուկ միջոցներ կիրառելու ոստիկանության լիազորության մասին: Ընդ որում՝ հավաքի մասնակիցներին առաջարկվել է հավաքն անցկացնել Ազատության հրապարակում կամ քաղաքի ոչ բանուկ այլ մասերում: 

Ոստիկանությունը հիշյալ կանխարգելիչ գործողությունները իրականացրել է հավաքի մասնակիցների նկատմամբ ուժ գործադրելուց հնարավորինս զերծ մնալու նկատառումներից ելնելով: 

Այնուամենայնիվ, բանակցությունները եւ համոզման աշխատանքները արդյունքի չեն հանգեցրել կազմակերպիչների հակազդեցության պատճառով: Ստեղծված իրավիճակում ոստիկանությունը ուժ է կիրառել՝ հիմք ընդունելով «Հավաքների ազատության մասին» Հայաստանի Հանրապետության օրենքի 34-րդ հոդվածը, համաձայն որի՝ հավաքը կամովին չդադարեցվելու դեպքում ոստիկանությունը ցրում է հավաքը: 

Ոստիկանական միջոցառման ընթացքում տարածքային բաժիններ են բերվել տասնյակ իրավախախտներ: 

Ոստիկանական գործողության շրջագծում հայտնվել են նաեւ լրագրողներ, որոնք հետեւողականորեն անտեսել են հավաքի վայրից ողջամիտ հեռավորություն պահպանելու եւ ոստիկանության օրինական գործողությունները չխոչընդոտելու կոչերն ու հորդորները, ըստ էության՝ դառնալով հավաքի մասնակիցներ:

Հրապարակային միջոցառումների ընթացքում լրագրողները պարտավոր են կրել եւ ներկայացնել տարբերակիչ նշաններ ու համապատասխան փաստաթղթեր, չխոչընդոտել ոստիկաններին իրենց մասնագիտական պարտականություններն իրականացնելիս:

Ոստիկանությունը բազմիցս զգուշացրել է լրագրողներին, որ ոստիկանության ծառայողի օրինական պահանջների կատարումը պարտադիր է բոլոր քաղաքացիների համար: 

«Վարչական իրավախախտումների վերաբերյալ» Հայաստանի Հանրապետության օրենսգրքի 182-րդ հոդվածը պատասխանատվություն է սահմանում հասարակական կարգի պահպանության, հասարակական անվտանգության ապահովման պահպանության պարտականությունները կատարելու ընթացքում ոստիկանության ծառայողի օրինական պահանջը չկատարելու համար: Նույն օրենսգրքի 261-րդ հոդվածի ուժով՝ ոստիկանության ծառայողի օրինական պահանջը չկատարելու դեպքում իրավախախտ անձանց նկատմամբ կարող է կիրառվել «վարչական ձերբակալում» հարկադրանքի միջոցը:

Տվյալ դեպքում, որոշ լրագրողների կողմից օրենքով նախատեսված պահանջներն անտեսվել են, ինչը եւ հանգեցրել է անցանկալի հետեւանքների:

Հունիս 23, 2015 at 15:13