Օրինակա՞ն են արդյոք Կարբի ձորում իրականացվող շինարարական աշխատանքները (Լուսանկարներ)

ԷկոԼուր

ՀՀ Արագածոտնի մարզի Կարբի ձորում առանց բնապահպանական փորձաքննության համապատասխան եզրակացության իրականացվում են շինարարական աշխատանքներ՝ ոչնչացնելով տեղի գեղատեսիլ բնական միջավայրը: Այս մասին ԷկոԼուրին ահազանգեց բնապահպան Սիլվա Ադամյանը: Բնապահպանի տեղեկություններով՝ այդ տարածքը բիզնես նպատակով օգտագործում են Արագածոտնի մարզպետ Սարգիս Սահակյանի եղբայրը և Կարբիի համայնքապետ Կարո Բաղդասարյանը:

«Դա իրականություն չէ: Կարբիի ձորում՝  Քասախ գետի կիրճում, Նոր Երզնկա համայքում, Գրիգոր Բաղդասարյանը /Կարո Բաղդասարյանի հայրը/ կառուցել է հանգստի գոտում ծածկոցներ և սննդի  սպասարկման վայր: Դրա հարակից տարածքում Նաիրի Սահակյանի /մարզպետ  Սարգիս Սահակյանի եղբայրը/ կողմից ևս կառուցապատվել են մի քանի ծածկոցներ, որը կառավարության կողմից փոփոխվել է բնակավայրերի, հասարակական կառուցապատման սննդի սպասարկման հողատարածքի: Նրանք հանդիսանում են այդ հողերի սեփականատերերը»,- ԷկոԼուրի հետ զրույցում ասաց Կարբիի համայնքապետԿարո Բաղդասարյանը:

Հարցին, թե հատվել են արդյոք ծառեր այդ տարածքներում, Կարո Բաղդասարյանն ասաց. «Ծառեր չեն հատվել, բոլոր ծառերն այդ տարածքի հատվել են դեռևս 90-ականներին, իսկ տարածքների սեփականատերերը տնկել են մոտ 1000 ծառ»:

Կարբիի համայնքապետի խոսքով՝ ամեն ինչը կառուցվել է օրենքին համապատասխան, համայնքապետի և ավագանու որոշմամբ:  Այլ թույլտվությունների վերաբերյալ Կարո Բաղդասարյանը նշեց, որ, քանի որ տարածքները սեփականաշնորհված են, դրանց կարիքը չի եղել:

ՀՀ բնապահպանության նախարարության տեղեկատվության և հասարակության հետ կապերի բաժնից ԷկոԼուրին հայտնեցին, որ բացվել է թեժ գիծ, և Բնապահպանական պետական տեսչությունը կայցելի Կարբի ձոր ու տեղում կստուգի իրավիճակը:

Ներկայացնում ենք Կարբի ձորի շինարարության լուսանկարները, որոնք վերցված են Սիլվա Ադամյանի ֆեյսբուքյան էջից:

Մայիս 21, 2015 at 18:30