ՀՀ Վայոց ձորի մարզի Հերհեր համայնքը կունենա չորս նոր արևային ֆոտովոլտային կայան՝ յուրաքանչյուրը 5 ՄՎտ դրվածքային հզորությամբ:
ՀՀ շրջակա միջավայրի նախարարությունը դրական եզրակացություն է տվել իրար հետ փոխկապակցված «Սուն Սոլար», «Դուստր Սոլար», «Արմ Սոլար» և «Այ Սոլար» ընկերությունների հայտերին:
Չորս փորձաքննական եզրակացություններն էլ տրվել են միևնույն պահանջների պարտադիր կատարման պայմանով: Մասնավորապես, նախարարությունը պահանջում է արևային կայանների շինարարության և շահագործման ընթացքում պարբերաբար իրականացնել շրջակա միջավայրի բաղադրիչների մոնիթորինգ, կազմել հետնախագծային վերլուծության ծրագիր, որը պետք է հասանելի լինի պետական շահագրգիռ մարմիններին և հասարակությանը: Պահանջներից է անհապաղ դադարեցնել ցանկացած տեսակի աշխատանքներ և դիմել լիազոր մարմնին, եթե նախատեսվող գործունեության տարածքում կհայտնաբերվեն ՀՀ Կարմիր գրքում գրանցված Սապսան թռչնատեսակի բներ, որտեղ կլինեն ձվեր կամ ձագեր:
Գործունեության ընթացքում առաջացող վտանգավոր թափոններն ընկերությունները նախատեսում են պահել թափոնների պահման տեղամասում, որից հետո կհանձնվեն լիցենզավորված ընկերությանը, որն էլ կիրականացնի դրանց տեղափոխումն ու կառավարումը: Այս հարցը բարձրացվել էր նաև հայտերի վերաբերյալ հանրային լսումների ժամանակ:
Հիշեցնենք, որ վերջերս ՀՀ շրջակա միջավայրի նախարարությունը դրական եզրակացություն էր տվել «Էդմ Սոլար» և «Էտ Սոլար» ընկերությունների՝ Ազատեկ բնակավայրում արևային կայանների կառուցման և շահագործման հայտերին: Այսպիսով, Վայոց ձորում կշահագործվի վեց նոր արևային կայան:
Հունիս 03, 2022 at 14:27