Այս տարի կմեկնարկի Արարատի, Գեղարքունիքի և Սյունիքի մարզերի 27 բնակավայրերում խմելու ջրի ենթակառուցվածքի նորոգման և կառուցման 6.2 միլիարդ դրամ արժողությամբ ծրագիրը: Սույն թվականի հուլիսի 21-ի նիստում ՀՀ կառավարությունը որոշում ընդունեց ՀՀ 2022թ. պետական բյուջեում վերաբաշխում և փոփոխություններ կատարելու և ՀՀ տարածքային կառավարման և ենթակառուցվածքների (ՏԿԵ) նախարարությանը գումար հատկացնելու վերաբերյալ:
ՏԿԵ նախարար Գնել Սանոսյանը զեկուցել է, որ որոշման նպատակն է գնման գործընթաց կազմակերպել Հայաստանի 3 մարզի 27 բնակավայրի համար. ամիսներ առաջ հայտարարվել է պայմանով մրցույթ գնման նման ընթացակարգով՝ այդ բնակավայրերում խմելու ջրի մատակարարման ցանցերը/ջրի մաքրիչ կայանները վերանորոգելու կամ ամբողջովին նորերը կառուցելու համար, հիմա անհրաժեշտ է սկսել շինարարական աշխատանքները: Ծրագիրը նախատեսված է 2022-2024թթ. իրականացնելու համար, ընդհանուր արժեքը՝ 6 միլիարդ 200 միլիոն ՀՀ դրամ գումար: Այս տարի անհրաժեշտ է հատկացնել 2 միլիարդ 468 միլիոն ՀՀ դրամ, որից 2 միլիարդ 414 միլիոն ՀՀ դրամը՝ շինարարության համար, 37 միլիոն ՀՀ դրամը՝ տեխնիկական և 15.8 միլիոն ՀՀ դրամը՝ հեղինակային հսկողության:
Վարչապետ Փաշինյանը նշել է այն բնակավայրերը, որտեղ իրականացվելու է նշված ծրագիրը. «Ըստ էության, արձանագրենք, որ սրանով մենք 6.2 միլիարդ դրամի ներդրումային ծրագիր ենք սկսում՝ խմելու ջրի ցանցերի վերականգնման համար: Եվ հիմա այն բնակավայրերում, որոնց անունը կբարձրաձայնվի, որոշ հատվածներում ընդհանրապես ջրագիծ չկա, և ջրագիծ կկառուցվի, իսկ այնտեղ, որտեղ կա, վերակառուցում և նոր ջրագծեր կլինեն: Խոսքը հետևյալ բնակավայրերի մասին է. հիմնական մասը Արարատի մարզի բնակավայրեր են՝ Արարատի մարզի Արտաշատ և Մասիս քաղաքներ, Ազատավան, Բերդիկ, Բուրաստան, Շահումյան, Ոստան, Վերին Արտաշատ, Վերին Դվին, Դվին, Նոր Ուղի, Նոր Կյանք, Փոքր Վեդի, Ղուկասավան, Նոր Կյուրին, Սիսավան, Արալեզ, Արբատ, Խաչփար և Մխչյան գյուղեր, Գեղարքունիքի մարզի 5 բնակավայրեր՝ Ներքին Գետաշեն, Վարսեր, Վահան, Կարմիրգյուղ և Սարուխան գյուղեր և Սյունիքի մարզի երկու բնակավայրեր՝ Մեղրի և Ագարակ քաղաքներ»:
Գնել Սանոսյանի պարզաբանմամբ՝ նշված բնակավայրերի ընտրությունը պայմանավորված է նրանով, որ դրանք «Վեոլիա ջուր» ընկերության սպասարկման տիրույթում են, և կան կարգավորման ենթակա խնդիրներ: Մասնավորապես, Արարատի մարզի 20 բնակավայրերը և ևս 50 բնակավայր հիմնականում Գառնիի աղբյուրների ջրով և տեղում պոմպերով են ջրամատակարարումն ապահովում, ծրագրում ներառված 20 բնակավայր գտնվում է ամենավատ վիճակում: Մեղրիի և Ագարակի պարագայում ամբողջովին կառուցվելու են ջրի մաքրման նոր կայաններ. Ագարակի մաքրման կայանը կառուցվել է 1960-ական թթ., որի ոչ միայն վիճակը լավ չէ, այլև հզորությունը չի բավարարում: Նույնը վերաբերում է նաև Մեղրիին: 6.2 միլիարդ ՀՀ դրամից շուրջ 2 միլիարդ ՀՀ դրամն ուղղվելու է Մեղրիում և Ագարակում ջրի մաքրման նոր կայանների կառուցմանը:
Վարչապետը նշել է, որ թե՛ ոռոգման, թե՛ խմելու ջրի ամենամեծ պրոբլեմը համակարգում տեղի ունեցող կորուստներն են, և կա կորուստների 2 ուղղություն: «Մի մասը վարչարարության կորուստներ են՝ չֆիքսված գծեր կամ, ենթադրենք, տեղում ինչ-որ ստվերային գործարքներ, բայց հիմնական՝ շատ մեծ մասն այն է, որ ջրի մատակարարման համակարգը մաշված, քայքայված է, այսինքն՝ ջուրը խողովակով գնալու փոխարեն լցվում է հողի մեջ և տեղ չի հասնում: Ենթադրենք, 100 լ ջուր ենք բաց թողնում, նշանակության կետ հասնում է երբեմն 40 լ, 30 լ, 20 լ, և, բնականաբար, ջուրը սպառողներին չի հասնում», - ասել է կառավարության ղեկավարը և անդրադարձել նաև «Վեոլիա ջուր» ընկերության գործունեությանը: ««Վեոլիա ջուր» ընկերության հետ մենք ունենք կնքած պայմանագիր, գործընկերային հարաբերություններ, իրենք ունեն պարտավորություններ, կառավարությունն ունի պարտավորություններ, և համակարգն արդյունավետ կառավարելու համար մենք պետք է փոխադարձաբար մեր պարտավորությունները հնարավորինս ժամանակին և ճշգրիտ կատարենք: Արդյունքում, իհարկե, պետք է շահի սպառողը, քաղաքացին», - եզրափակել է Նիկոլ Փաշինյանը:
Հուլիս 25, 2022 at 10:35