Սևանա լճում սիգի արդյունագործական որսի չափաքանակը կավելացվի ևս 300 տոննայով՝ կազմելով 600 տոննա, իսկ որսի իրականացման ժամկետը կերկարաձգվի մինչև նոյեմբերի 20-ը։ Գործադիրն այս մասին որոշումն ընդունեց 2022թ. օգոստոսի 24-ին կայացած նիստում:
Որոշման հիմնավորման մեջ նշված է, որ փոփոխություններ կատարելու անհրաժեշտությունը բխում է 2022թ. մարտի 1-ից մեկնարկած Սևանա լճում սիգի արդյունագործական որսի գործընթացի իրականացման կարգավորման անհրաժեշտությունից: Մասնավորապես, պատճառն այն է, որ նշված 300 տոննա թույլատրելի քանակը գրեթե ամբողջությամբ որսվել է ձկնորսների հետ պայմանագրերը կնքելուց հետո:
Այսպես՝ 2022թ. համար մարտի 1-ից մինչև սեպտեմբերի 1-ը Սևանա լճում արդյունագործական որսի իրականացման համար սահմանված է եղել 300 հազար կգ (300 տոննա) սիգի չափաքանակ, արդյունագործական որսն իրականացվել է 2022թ. ապրիլի 21-ից, նախապատրաստվել է 571 պայմանագիր՝ 300 հազար կգ ձկան համար, փաստացի կնքվել է 567 պայմանագիր՝ 295 798 կգ սիգի արդյունագործական որս իրականացնելու համար: 2022թ. աշնանային որսաշրջանի կազմակերպման նպատակով՝ կազմակերպվել են մի շարք քննարկումներ ԳԱԱ «Կենդանաբանության և հիդրոէկոլոգիայի գիտական կենտրոն» ՊՈԱԿ-ի մասնագետների, Գեղարքունիքի մարզը ներկայացնող ԱԺ պատգամավորների, «Սևան» ազգային պարկի, Գեղարքունիքի մարզպետարանի աշխատակիցների, ձկնորսների և այլ շահագրգիռ անձանց հետ։ Սևանա լճում ձկան արդյունագործական որսի կանոնակարգման և աշնանային որսաչափի վերաբերյալ լրացուցիչ տվյալների ձեռքբերման պահանջից ելնելով` ՀՀ ԳԱԱ Կենդանաբանության և հիդրոէկոլոգիայի գիտական կենտրոնի կողմից իրականացվել են Սևանա լճում ձկան պաշարների գնահատման համար լրացուցիչ ուսումնասիրություններ, որոնց արդյունքում ձեռքբերված տվյալների հիման վրա գիտական կենտրոնի կողմից 2022թ. սեպտեմբերի 1-ից մինչև նոյեմբերի 20-ը ընկած ժամանակահատվածի համար առաջարկվել է սիգի արդյունագործական որսի ևս 300 տոննա չափաքանակ՝ հնարավորություն ընձեռելով օրինապահ ձկնորսներին սահմանված կարգավորումներին համապատասխան իրականացնել սիգի արդյունագործական որս:
Ըստ հիմնավորման՝ նախագծի ընդունմամբ նախատեսվում է շուրջ 19 500 000 դրամ բնօգտագործման վճարի վճարում պետական բյուջե։
Օգոստոս 24, 2022 at 17:54