2023թ. նոյեմբերի 16-ին «Սևանի իշխանի պաշարների վերականգնման և ձկնաբուծության զարգացման» հիմնադրամի կողմից Սևանա լիճ բաց է թողնվել պետական միջոցների հաշվին աճեցված մանրաձկան հերթական խմբաքանակը՝ Սևանի իշխանի «Գեղարքունի» տեսակի 100 հազար հատ մանրաձուկ, 3,9 գրամ միջին քաշով։ Այս մասին տեղեկացնում է Շրջակա միջավայրի նախարարությունը:
Բնապահպանական միջոցառմանը մասնակցել են Շրջակա միջավայրի նախարարի տեղակալ Արամ Մեյմարյանը, Գեղարքունիքի մարզպետի տեղակալ Վահան Զարոյանը, «Սևան Ազգային պարկ»-ի, Շրջակա միջավայրի նախարարության, Գեղարքունիքի մարզպետարանի, «Սևանի իշխան»ՓԲԸ ներկայացուցիչներ։
«Շրջակա միջավայրի նախարարության ընթացիկ ծրագրում նաև Սևանի իշխանի պահպանության ու վերարտադրության քաղաքականությունն է, որի շրջանակներում էլ այսօր իրականացնում ենք սույն միջոցառումը։ Միաժամանակ մեր ուշադրության կենտրոնում են Սևանա լճի և լիճ թափվող գետերի ջրային և կենդանական ռեսուրսների պահպանության խնդիրները, որոնց փորձում ենք լուծում տալ մեկ ընդհանուր ծրագրային փաթեթով, իրար փոխկապակցված ու փոխլրացնող քայլերի իրականացմամբ», - նշել է ՀՀ Շրջակա միջավայրի նախարարի տեղակալ Արամ Մեյմարյանը։
«Սևանի իշխան» ՓԲԸ-ի տնօրեն Տիգրան Վարդանյանի տեղեկացմամբ՝ 2023թ. ընթացքում սա նմանատիպ երկրորդ միջոցառումն է, որի արդյունքում ընդհանուր գումարով Սևանա լիճ է բաց թողնվել «Գեղարքունի» տեսակի 230 հազար հատ մանրաձուկ։
Լուսանկարը՝ Սամվել Պիպոյանի
Նոյեմբեր 17, 2023 at 13:54