ԱրմԻնֆո
Այսօր` մարտի 24-ի առավոտյան Երևանի դրամատիկական թատրոնին և Իսահակյան 28 շենքին հարող տարածքում հատվել է 16 մատղաշ ծառ: Շենքի ադմինիստրատորի ասելով, ծառերը հատվել են առավոտյան ժամը 4-ին անհայտ անձանց կողմից:
Նշենք, որ բարբարոսության այդ ակտն Իսահակյան փողոցի հետևողականորեն կրճատվող «կանաչ» գոտու նկատմամբ թվով արդեն չորրորդն է: Ընդ որում բոլոր այդ «միջոցառումներն» անցկացրել են դարձյալ «անհայտ անձինք»: Ըստ երևույթին, մայրաքաղաքի բնակիչների առողջության հաշվին հերթական «օբյեկտը» կառուցելու ձգտումն ակնհայտորեն հանգիստ չի տալիս հայրենական վայ-գործարարներից ոմանց, ովքեր խեղաթյուրված պատկերացում ունեն ձեռներերցության մասին:
Հիշեցնենք, որ մարտի 22-ին Երևանի քաղաքապետ Կարեն Կարապետյանը Հանրային խորհրդի լիակազմ նիստի ընթացքում հայտարարել էր, թե քաղաքապետարանը ոչ մի կառուցապատում թույլ չի տա մայրաքաղաքի կենտրոնում: «Մենք պետք է գիտակցենք, որ ապրում ենք մեգապոլիսում և, առավոտներն արթնանալով, երբեք չենք լսի աքլորականչը կամ գետի կարկաչը: Այո, ճարտարապետությունը պետք է լինի կոմերցիոն, սակայն այդ կոմերցիոն ճարտարապետությունը պետք է ունենա սահմանափակում: Կանաչ գոտիները մենք բիզնեսին չենք տա», - հայտարարել էր քաղաքապետը:
Մարտ 24, 2011