Էկոլուր
Ինչպես տեղեկացնում են «Մենք ենք այս քաղաքի տերը» քաղաքացիական նախաձեռնության ակտիվիստները` Ագրարային համալսարանի եւ Ազգային գրադարանի միջեւ տեղակայված «Ուսանողական այգու» պաշտպանության համար սկսված ստորագրահավաքին արդեն 10 հազարից ավել մարդ է միացել: Ստորագրահավաքը կշարունակվի մինչև մայիսի 14-ը:
«Մարդիկ մեծ ցանկություն ունեն միանալու ստորագրահավաքին, բայց այս մի քանի օրվա ընթացքում չեն հասցրել։ Ստորագրահավաքը մեծ թափ է առնում ու իր ակտիվ փուլը մտնում, եւ դրա համար որոշեցինք եւս մեկ շաբաթով երկարաձգել այն»,- ասում է նախաձեռնող խմբի ակտիվիստ Մարիամ Սուխուդյանը:
Սուխուդյանը նաեւ նշում է, որ որ այժմ բացի Թամանյանի արձանի մոտ ստորագրություններ հավաքելուց, նախաձեռնող խմբի կամավորները կշրջեն քաղաքի մարդաշատ այլ վայրերում՝ շենքերում, ակումբներում եւ այլն։
Ստորագրահավաքն ուղղված է «Ուսանողական զբոսայգում» ծավալված շինարարական աշխատանքների դեմ։ Ստորագրությունները փոխանցվելու են ՀՀ նախագահ Սերժ Սարգսյանին, ԱԺ նախագահ Հովիկ Աբրահամյանին, վարչապետ Տիգրան Սարգսյանին եւ Երեւանի քաղաքապետ Գագիկ Բեգլարյանին։
Մայիս 10, 2010