Գլաձոր խոշորացված համայնքում կոնֆլիկտ է առաջացել «Մետալ Գոլդ» ընկերության երկրաբանական հետազոտությունների պատճառով

Գլաձոր խոշորացված համայնքում կոնֆլիկտ է առաջացել  «Մետալ Գոլդ»  ընկերության երկրաբանական հետազոտությունների պատճառով

Վայոց ձորի մարզի Գլաձոր խոշորացված համայնքում կրկին կոնֆլիկտներ են առաջացել` պայմանավորված ՀՀ տարածքային կառավարման և ենթակառուցվածքների նախարարության կողմից «Մետալ Գոլդ» ընկերությանը՝ Գլաձորի բազմամետաղային հանքավայրում 3 տարի ժամկետով արդյունաբերական նպատակով երկրաբանական հետազոտության թույլտվության տրամադրմամբ:

«Մետալ Գոլդ»-ը Գլաձոր համայնքից թույլտվություն ստանալու նպատակով հանրային լսում էր նախատեսում անցկացնել, թեպետ ըստ ընկերության ծրագրի, աշխատանքները կրելու էին զուտ գրասենյակային և համակարգչային բնույթ և դաշտային աշխատանքների հետ որևէ առնչություն չէին ունենալու։ 2021թ. մայիսի 11-ին Գլաձոր համայնքի բնակիչները թույլ չտվեցին հանրային լսումների անցկացումը:

Ներկայումս համայնքում տեղի են ունենում տարբեր հանդիպումներ և քննարկումներ: ԷկոԼուրի թիմը մասնակցեց նմանատիպ քննարկումներից մեկին, որը, ինչպես և ավելի վաղ հայտարարվել էր, նվիրված էր այդ տարածքի էկոլոգիական անվտանգությանը: Հանդիպման ընթացքում ծագեցին կոնֆլիկտային իրավիճակներ, քանի որ զբաղվածության խնդիր ունեցող երիտասարդների մի մասն ընկերությունից ստացել էր աշխատատեղեր ստեղծելու խոստումներ: Նրանք կոնֆլիկտի մեջ մտան տեղի այն բնակիչների հետ, ովքեր դեմ էին համայնքում հանքագործների ցանկացած տեսակի գործունեությանը:

Հիշեցնենք, որ Գլաձոր համայնքի բնակչությունը դեմ է հանքավայրի շահագործմանը, հետախուզական աշխատանքների իրականացմանը, իսկ համայնքի ավագանին հավատարիմ է իր՝ 2019թ. ապրիլի 29-ին ընդունած «Գլաձոր համայնքը էկոտնտեսական տարածք դարձնելու և համայնքում մետաղական հանքարդյունաբերությունը արգելելու վերաբերյալ» թիվ 44 որոշմանը: Հանրագրով Գլաձոր համայնքի կազմի մեջ մտնող Գլաձոր, Վերնաշեն և Գետափ գյուղերի 2152 բնակիչներ խնդրել և պահանջել են արգելել և ապագայում բացառել Գլաձոր համայնքի վարչական տարածքում մետաղական հանքարդյունաբերության հետ կապված հետախուզական, առավել ևս հանքավայրերի շահագործման հետ կապված աշխատանքների իրականացումը:

Որպես հանքարդյունաբերությանն այլընտրանք՝ տեղի բնակիչներն իրենց համայնքի զարգացումը տեսնում են գյուղատնտեսության, գինեգործության և տուրիզմի մեջ: Գլաձորի համայնքապետ Արմեն Մովսիսյանն ԷկոԼուրի հետ զրույցում նշեց, որ Կորեկի ձոր կոչվող տարածքում ջրամբարաշինության ծրագիր է քննարկվում: «Այդ ծրագրի իրականացման դեպքում Մալիշկայում, Վերնաշենում և Գլաձորում 800-900 հա ոռոգելի կդառնա»,- ասաց նա:

ԷկոԼուրի թիմը կարծում է.

  1. Չնայած ընկերության ծրագրում ընդգծվում է, որ իրականացվելու են գրասենյակային աշխատանքներ, սակայն ընկերությունը նախատեսում է անցկացնել դաշտային աշխատանք և համայնքից ուսումնասիրության համար վերցնել 10 000 խմ փորձանմուշ: Դաշտային աշխատանքների անցկացումը պահանջում է բնապահպանական փորձաքննության անցկացում, ինչի համար անհրաժեշտ է համայնքում նախնական լսումների անցկացումը համայնքի համաձայնությունը ստանալու համար: Այսինքն՝ ներկայացված ծրագրում կան հակասություններ:
  2.  Ծրագրում բացակայում է գործունեության հետևանքների՝ բնապահպանական մասի նկարագրությունը, ուստի հնարավոր չէ գնահատել հետազոտման ենթակա տարածքներում առկա ՀՀ  կարմիր գրքում գրանցված բուսական և կենդանական  աշխարհի ներկայացուցիչների, ստորգետնյա աղբյուրների, Արփա, Եղեգիս, Գրաֆ, Մալիշկա և հանքավայրի տարածքով հոսող Կորեկի–ձոր գետերի վրա Ծրագրի գործունեության հնարավոր ազդեցությունները։ Հնարավոր չէ նաև տալ եզրակացություն դրանց վրա բացասական ազդեցության կանխարգելման, վերացման կամ նվազեցման համար նախատեսվող միջոցառումների մասին։
  3. Ուսումնասիրվող տարածքի կենտրոնական մասը գտնվում է «Եղեգնաձոր» պետական արգելավայր հատուկ պահպանվող տարածքի անմիջական սահմանագծից մոտ 650 մետր հեռավորության վրա, սակայն բնության հատուկ պահպանվող տարածքի վրա ազդեցությունը նույնպես գնահատված չէ։
  4. Ներկայացված աշխատանքային Ծրագրից հետևում է, որ ուսումնասիրությունները կատարվելու են հանքավայրի՝ հետագա շահագործման նպատակով /որպես օրինակ ունենալով նախկինում ոսկու կորզման նպատակ հետապնդող Ընկերության նկրտումները/:  Այստեղ ակնառու է բնական պաշարների արդյունավետ, համալիր և բանական օգտագործման սկզբունքի խախտման միտումը։
  5. ՏԻՄ մարմինները հողհատկացում չեն կատարել երկրաբանահետախուզական աշխատանքների համար /այդ ոլորտում դատաիրավական գործընթացները դեռևս գտնվում են ընթացքի մեջ/։

Օգոստոս 11, 2021 at 17:22


Առնչվող նյութեր


Կատեգորիա

ավելին
պակաս

Մարզեր