ԷկոԼուր
Հրազդանի հանքավայրի շահագործման արդյունքում ջրից կարող է զրկվել ոչ միայն Հրազդանը, այլ նաեւ Երեւանը: Խմելու ջրի աղբյուրները գտնվում են 600-700 մ հեռավորության վրա Հրազդանի երկաթահանքից, որը չինական «Fortune Oil» ընկերությունը մտադիր է շահագործել բաց եղանակով: «Այդ աղբյուրները Երեւանին տալիս են 30-40% խմելու ջուր: Կամ մենք կզրկվենք խմելու ջրից, կամ այն աղտոտված կլինի տոքսիկ մետաղներով»,- կարծում է «Հանուն կայուն մարդկային զարգացման» ասոցիացիայի նախագահ Կարինե Դանիելյանը:
Օրերս Հայաստանյան տեխնոլոգիական ակադեմիայի կազմակերպած Հրազդանի հանքավայրի բաց եղանակով շահագործման քննարկման ժամանակ բացասական գնահատական տրվեց նոր հանքավայրերի յուրացման հեռանկարներին: «10 տարի անց ամեն ինչ կսպառվի: Ապա ի՞նչ ենք մենք թողնելու մեր սերունդներին,- ասաց ակադեմիայի անդամ Գագիկ Ղազարյանը,- մենք անընդհատ լսում ենք, որ հարկավոր է զարգացնել ինովացիոն տեխնոլոգիաները, բայց տեսնում ենք, որ այդ ուղին ինովացիոն տեխնոլոգիաների հետ ոչ մի ընդհանրություն չունի»:
Ապրիլ 12, 2011